Nongpoh, Nailur 28: Ka National Commission for Indian System of Medicine (NCISM) kala ai jingbit ia ka University of Science and Technology Meghalaya (USTM), Ri Bhoi District, ba kan plie ia ka Ayurvedic Medical College hapoh ka campus.
Ia kane la pyntip da u Chancellor ka UTSM, M Hoque uba la iathuh ba ka NCISM jong ka Ministry of Ayush kala phah ia ka shithi ai jingbit bala tip kum ka Letter of Intent sha ka skulbah. U iathuh, kaba sah mynta ka long satang ban pyndep ia ki katto katne ki kam ba hap pynbiang khamtam ka jingsiew ia ka pisa ba T. 2 klur kum ka Endowment Fund sha ka Ministry.
U Hoque u pynpaw “Ka dei ka jingangnud bala slem jong ka University ban plie ia ka Medical College. Ngin sa pyndep noh shaid shaid ia ki kam ba dang sah ban lah plie noh ia ka Ayurvedic Medical College hapoh une u snem ba mynta”.
Kane ka jingioh jingbit kala wan kum ka khubor kaban sah jingkynmaw ia kane ka University ha kaba ki samla pule Kynthei bad Shynrang lem bad ki Nonghikai kila iamih sha phyllaw ban iashad iakmen ia ka jingiohlad ka University ban jam sa ia uwei u mawjam ha ka jingshakri ban pynphriang ia ka jingnang jingstad.
