Shillong, Risaw 26 : Ka Sorkar Jylla hynne ka sngi Balang, kala pynkup burom ia ki lai ngut ki Nongiakhun Kti (Arm Wrestler) kiba ioh khur takma na ka 43rd World Arm Wrestling Championship 2022 kaba long ha Antalya, Turkey.
Kine ki laingut ki kynthup ia I Kong Margret Pathaw na Umsning, Mylliem Umlong Khunsyiem Angel Mary bad u Alexander Lyngdoh na Ri-lum Jaintia.
Ia kine ki laingut kiba la wanphai iing, la pdiang burom hynne ka sngi ha ki jingialang bala pynlong ha Ri-Bhoi kaba la leit ban iashimbynta lang da u Myntri Rangbah ka Jylla Conrad K Sangma, u Myntri kam Ialehkai Bah Banteidor Lyngdoh bad kiwei kiwei ki Heh Sorkar.
Recognition of the achievements of our sportspersons is necessary to boost their confidence & to motivate them to do better. We will continue to support their ambitions.
We take pride in their achievements & we wish them more success in the years to come. pic.twitter.com/4wtd3MFWgE
— Conrad Sangma (@SangmaConrad) October 26, 2022
Ia kine ki laingut la pdiang burom da ki Kynhun Seng ba kynthup ia ka Ri-Bhoi District Sports Association, ka Umsning Town Dorbar, ka Khasi Students Union –North Khasi Hills bad kiwei kiwei.
Kine ki laingut ki Nongiakhun Kti ki dei napdeng ki 10 ngut ki nongialehkai na Meghalaya kba ila mihkhmat ia ka kynhun na India sha kane ka lympung iakhun kti jong ka Pyrthei.
I Kong Margret Pathaw ila ioh ia ka takma ksiar ha ka jingiakhun kti ka diang ki kynthei ba 68 kilo bad takma rupa ha ka kti ka mon ha ka kyrdan ba 60 kilo master klass, I Angel Mary ila ioh ia ka takma rnong ha kajuh ka lympung iakhun katba u Alexander ula ioh ia ka takma rnong ha ka jingiakhun ki shynrang ba khia 80 kilo.
Na ka liang ka KSU, NKHD la lamkhmat da u Bah Lambok Rymbai, Vice President katba na ka liang ka RBDSA la lamkhmat da u Bah RB Shadap kum u president kiba la pynlong ia ka jingpdiang burom ha Nongpoh bad hakhmat ka ophis ka RBDSA.
Katba ha ka jingpdiang burom jong ka Umsning Town Dorbar la shimbynta naduh ki Rangbah Shnong jong ki 6 tylli ki shnong kiba hap hapoh kane ka Dorbar kiba kynthup naduh u Bah Rocky Marwein, u Bah Carlus Kharkongngor Vice Chairman nalor kiwei kiwei ki riew rangbah kynthup ruh ka Seng Longkmie bad ki khun samla.
Haba pynpaw ia ka jingkmen halor kane ka jinglah jong ki rang bad thei iakhun kti kiba la wanrah ia ki takma bapher bapher na ka lympung kaba la long ha Turkey, ki la pynpaw ia ka jingsngewsarong kaba khraw ba ki rang bad ki thei ialehkai ka jylla ki la nang kiew ha kane ka kam ialehkai sport tad haduh ki la lah ban wanrah ia ka nam ka burom ymtang ia la ka district, hynrei wat ia ka jylla bad ka ri hi baroh kawei bad ki la kitbok kitrwiang ruh ia ki ba kin nang kiew na kawei ka sngi sha kawei pat ha kane ka jingialehkai sport.
