Shillong, Risaw 26 : Ka Maitshaphrang hynnin ka sngi ba-ar, kala kyntu ia ka Meghalaya State Commission for Women (MSCW) ba kan tuklar lem ha kaban pyntreikam noh mardor ia ka Meghalaya Compulsory Registration of Marriage Act, 2012.
Ha ka shithi bala phah sha ka Chairperson ka MSCA Kong Phidalia Toi, u Convener ka Maitshaphrang Bah Michael Syiem ula ong “Ngi kyrpad ia ka Commission ban iakren ia kane ka sorkar bad ka sorkar ban wan hadien u 2023 ban pynthikna ba kin pyntreikam ia ka Meghalaya Compulsory Registration of Marriage Act 2012 khlem da pynslem shuh khnang ban lah leh eiei noh ha ka ban tehlakam ia ki jingeh kiba mih naka jingiashongkha ba khlem register ha Jylla, ki bym don jingiadei tang bad ka jingieh lok, hynrei ka jingeh kum ka jingiaid awria, jingshongkha khynnah, ki Khun ba khlem Kpa bad ki Khun ba bun kpa nalor kiwei kiwei. Ngi thikna ba kine ki dei katto katne na ki jingsngewkhia ba hakhmat jong ka Commission”.
Ka Meghalaya Compulsory Registration of Marriage Act 2012 ka dei kaba la mynjur da ka Iingdorbar Thaw Ain ka Jylla halor ka jingthmu ban leh eiei noh halor ka jingnang bun ki jingiaphet lok, khamtam kiba iashongkha khlem register ha kaba bun ki Kynthei bad ki Khynnah kila shah ieh hala ki jong ki Kpa khlem da ai bai bam ne jingkyrshan namar ka jingbym don ka ain ban register ia ka jingiapoi kha.
U Bah Michael ula ong ba u Myntri Rangbah ka Jylla Conrad K Sangma ha ka jubab ia ka zero hour notice bala wanrah da u MLA ka North Shillong ha ka 11 tarik Lber 2021, ula mynjur ia ka jinglong kongsan ban register ia ka jingiashongkha khamtam ha jylla Meghalaya.
Ula ong ba ka Maitshaphrang ka tip ba ki don bun ki Kynthei ba shah ieh, iaphet lok shiteng por kiba la leit ud leit nam sha ka Meghalaya State Commission for Women ba kan iarap ha kaban pynioh ia ka baibam bad ruh ia ki jingeh ba ki iakynduh na ka jingbym register ia ka jingiapoi kha.
