Nongstoiñ, Risaw 25: Ki nongïalam ka West Khasi Hills Boxing Association, ki la phah ïa u kyrwoh ai khublei kitbok kit rwiang ïa ki ar ngut ki heprit, ki ban leit shim bynta ha ka 1st Northeastern Zonal Sub Junior ka ban long ha ka jylla Arunachal Pradesh naduh ka 27 tarik haduh ka 31 tarik mynta u bnai.
Kine ki heprit ba la shah jied na ka District ki dei u Maitphang Mawsor 13 snem (34 kg) ba dei na ka skul KJP Synod Sepngi HSS Nongstoiñ bad I heprit Ibanpynsuk Thabah 14 snem (50 kg) na ka skul Christ Disciple Girls SS Nongstoiñ.
U President Bah D.Sun u ba long ruh ha kajuh ka por kum u Community Coach, u la ïathuh ba hynne ka sngi 25 tarik la dep ban pynpoi ïa kine ki heprit ha Shillong bad la aiti ha ki nongkitkam jong ka Meghalaya Boxing Assocïation, ba kin nang leh ïa kaba donkam.
Na ka liang ka Synjuk, ngi phah ïa u kyrwoh kit bok kit rwiang ïa kine ki heprit ha kaba kin sa shimbynta ha katei ka lympung ba heh hapoh North East. Ngi kitbok ruh sha baroh ki nongïakura jong ka jylla hapoh ka jingïalam jong ka MBA, ba kin poi sha ka nam ka burom kum ki nongïakura ba pawnam.
