Shillong, Risaw 24 : Ki san tylli ki Sengbhalang ka Jylla hynne ka sngi nyngkong kila rai ban pyntreikam da ka ‘Save Hynniewtep Mission’ da kaba pynlong ia ki jingiakhih bapher bapher ban pynbor ia ka Sorkar Jylla ba kan pyntreikam ia ki khyndai tylli ki mat jingdawa ba kynthup ia ka Inner Line Permit (ILP) hashuwa ka elekshon MLA 2023.
Ia kane ka rai la shim ha ka jingialang jong ki san tylli ki Sengbhalang ba kynthup ia ka Hynniewtrep Youth Council (HYC), East Jaintia National Council (EJNC), Jaintia Students’ Movement (JSM), Hynniewtrep Achik National Movement (HANM) bad ka Confederation of Ri Bhoi People (CoRP).
“Kin don bun jait ki jingiakhih ha kine ki khyndiat sngi ban wan ban pynthikna ba ka Sorkar Jylla kan pyntreikam ka ki khyndai tylli ki mat jingdawa shuwa baka model code of conduct (MCC) kan treikam ha Jylla namar ka elekshon MLA 2023” ong u General Secretary ka HYC samla Roykupar Synrem haba iakren bad ki nongthoh khubor.
U Samla Roykupar ula pyntip ruh ba ki san tylli ki Sengbhalang kila dawa ban pynkynriah noh mardor ia ka Them Metor na Them Iew Mawlong, ban khmkh biang ia ka MOU bala iasoi hapdeng ka Jylla bad ka Assam ha ka jingiapynbeit pud jong ka wat kaba nyngkong, ban pynsajia ia ki Pulit kiba donkti ban pyniap ia u Nongialam barim ka HNLC Bah Cheristerfield Thangkhiew, ban pynsajia ia ki briew kiba donkti ha ki kam bamsap bapher bapher, ban weng ia ka jingeh ha ka jingbym iohkam iohjam, ban pyndam ia ka Meghalaya regulation of Gaming Act, 2012 bad kiwei kiwei.
Kat kum ka jingong jong u, kine ki dei ki ishu kiba la sahteng la slem bha bad kiba la ktah bha ia ki paidbah ka Bri u Hynniewtrep.
Hynrei ula kyntait pat ban iathuh bniah ia kiei ki sienjam ba thmu ban shim da kine ki Sengbhalang haba ong “kan sa don ka jingiakhih ia kaba yn sa pyntip sha ki lad pathai khubor bad kane kan dei ka jingiakhih ba kyndit kyndit”.
Haba ther ia ka Sorkar MDA namar ka jingbymlah ban tynruh ia ka Sorkar pdeng ban pyntreikam ia ka ILP bad ban pynrung ia ka ktien Khasi ha ka khyrnit ba phra jong ka Ri Synshar ka ri, u samla Roykupar ula ong “ Ki artylli ki resolution bala mynjur da ka Sorkar Jylla ki dei tang ki jingtap eitmiaw bad ban pynjai jai ia ka jingiakhih ki paidbah bad ka jingshisha hi kim don satia ia ka jingmut kaba shisha ban pynthikna ba kine ki kam kin ioh jingmynjur naka Sorkar Pdeng”.
Haba dawa iaka Sorkar ban pynkloi noh ia ka jingthungkam ha ki hajar tylli ki kam ba lait thylli, u samla Roykupar ula ong “Kat kum ka jingpan RTI jong uwei na ki nongwad RTI, la pyntip ba ki don haduh 8000 tylli ki kam ki bym pat thung briew satia. Lada ka long kumne, kaei kaba jia ia ka pisa bala mang sha kine ki kam. Shaei ba ka Sorkar ka pynlut ia kane ka pisa? Kine ki dei ki jingkylli kiba ngi hap ban kylli ia ka Sorkar. Namar kata, ngi dawa hakhmat ka Sorkar ba dei ban thung briew noh kham kloi ha ki kam kiba lait thylli”.
Nalor kane, ki san Sengbhalang kila dawa ia ka sorkar Jylla ban mynjur da ka Ordinance lane khot mardor ia ka Special Sesssion (Dorbar Kyrpang) jong ka Iingdorbar ban pynduh pyndam noh ia ka MRGA actm 2021 ban khyllip noh shisyndon ia ka kam plie casino hapoh ka Jylla.
Ha kajuh ka por, une u Nongialam ka HYC ula ong ba ka jingialang kala rai ban dawa naka Sorkar Jylla baka dei ban kyndang noh ia baroh ki briew kiba sah beain ha Them Iewmawlong.
“Ka Sorkar ka dei ban pynthikna ba tang ki nongshongshnong kiba la ioh jingbit ki dei ban ioh ia ka jingiarap” ula ong haba ban jur ia ka jingdonkam baka Sorkar Jylla kan pynbeit ia kane ka jingdawa bala slem bha ban pynkynriah ia ka Them Metor kham kloi kat kaba lah.
