Imphal, Risaw 24 : Na ka liang kiba haiing hasem jong ki lanot ka Manipur kiba la iap lyngba ki jingshah kynnoh pyniap klep ha ki bor pahara shabar ka jingtip jong ka ain (extrajudicial killing) kiba la jia ha ka snem 2000 bad 2012, kila pdiang sngewbha ia ka jingshim rai jong ka iingbishar Supreme Court ha kaba iadei bad kane ka phang.
Na ka liang ka Extrajudicial Execution Victims’ Families Association Manipur (EEFVAM) bad ka Human Right Alert (HRA) kila pdiang sngewbha ia ka jingshim rai jong ka Supreme Court, kaba la kyntu ia ka iingbishar high court ka Manipur ba kan shim ia ka rai halor ka mat kaba iadei bad ka jingaibor na ka bynta ban tian bishar ia kito ki bor pahara kiba donkti ha kitei ki kam pyniap klep kiba la jia shabar ka jingtip jong ka ain hapoh Manipur.
Lah ban kdew ba ka Supreme Court ha ka sngi Palei ba la lah kala hukum ia ka high court ka Manipur ba kan pynkut noh ha kaba iadei bad ka mat jong ki jingjia shah pyniap klep kiba la jia shabar ka jingtip jong ka ain kaba dang sahteng hapoh kane ka iingbishar high court, kata hapoh ka hynriew bnai.
Nalor kata ka Supreme Court kala shah ruh na ka bynta ki jingpynpynpaw ia kiba la file da ka sorkar pdeng na ka bynta ki ophisar jong ka kynhun tohkit Special Investigation Team (SIT) kaba la shah pynkhamti ban pynlong ia ka jingtohkit ha kaba iadei bad kitei ki kam pyniap hapoh katei ka jylla kaba long ruh katkum ka hukum ba la pynmih da katei ka iingbishar kaba hakhliehduh ha u bnai Naitung 2017.
“Ngi pdiang sngewbha ia ka jingshim rai jong ka Supreme Court ha kaba iadei bad kane ka phang.Ki case kiba iadei bad ka jingtian bishar kila sahkut hapoh ka iingbishar high court ka Manipur lah jan shisnem shiteng mynta.Kumta, kane ka jingpynmih hukum da ka Supreme Court ka dei ka sienjam kaba la pdiang sngewbha,” ong u executive director ka HRA u Babloo Loitongbam hynnin ka sngi U Blei.
Ia ka public interest litigation (PIL) la ujor hapoh Supreme Court ha u snem 2012 da ka EEFVAM bad ka HRA kiba la dawa ban pynlong ka jingtohkit halor ki 1528 tylli ki case jong ki jingjia shah pyniap klep ia kiba la kynnoh ba la leh halor ka nongrim jong ki kyndon ka armed forces special powers act (AFSPA).
