Shillong, Risaw 23: Ka Transit Home lyngba ka Chief Minister Safe Motherhood Schemes (CM-SMS) kala pyni ba ka long ka jingmyntoi ia kito ki longkmie kiba pun khun kiba don hapdeng ka jingpang jingshitom ha ki shnong kiba jynjar ka leit ka wan.
Katei ka sienjam jong ka sorkar jylla ka thmu ban pynduna iaka jingiap ki khunlung bad ka kmie kaba punkhun hapoh ka jylla Meghalaya.
Ka Tira T Sangma, kaba la don 21 snem na ka Shnong Imbegre, West Garo Hills, ka dei ka Longkmie kaba don hapdeng ka jingshitom bad kaban sa kha ia i khun balai hapoh ka Asanang PHC. Kane ka longkmie kan leit ban kha nyngkong eh ia i khunlung haka jaka sumar, katba ki ar ngut ki khun jong ka kidei kiba la kha hi hapoh ïing da ka jingiarap jong ka nongai jingsumar tynrai bad ka kmie jong ka.
Ka Tira, kadei kaba don iaka jingpang Anemia haba kala leit ban phah khmih bniah ialade ha ka Village Health Nutrition Day (VHND) kaba la pynlong da ka Auxiliary Nurse Midwife (ANM) bad la bthah iaka ba kadei ban kiar iaka jingkha khun hapoh ïing. Kumta hadien 10 sngi ka Tira ryngkat bad u kurim jongka kila leit sha Asanang Transit Home kaba la pyniaid daka Mahila Asanang Self Help Group, kaba la plie da u Myntri Rangbah ka jylla Conrad K Sangma.
Katei ka CM-SMS Scheme ka kynthup ia ki 4 tylli ki bynta kata ban tei iaka Transit Home na ka bynta ki longkmie kiba punkhun, ban ai jingkyrshan ia ki ANM khnang ban pynthikna ba kin lah ban pynsngewthuh paidbah iaka jingdonkam ban sumar ka kmie bad i khun ha thaiñ nong kyndong, ka kali kaba kyrpang ban pynkit ia ki longkmie kiba punkhun sha ki PHC/CHC ban ioh iaka jingsumar bad ka jingai pisa ia kito ki nongsumar tynrai halor ka jingpynshlur ka jongki ia ki bahaiing bahasem ba kin donlang ryngkat bad ka kmie bad ban sahlang.
Ki Transit Home kidie ki jaka sah kiba don marjan bad ki PHC/CHC ha kaba ki longkmie kiba pun khun kiba don hapdeng ka jingpang jingshitom ki lah ban sah khnang ba kin lah ban ioh iaka jingsumar.
Ki longkmie kiba sah ha ki Transit Home kin ioh iaka jingsumar kaba man la ka sngi, ki dawai dashin bad ka bam ka dih kiban tei iaki bad ki kmie ki ioh ruh iaka jinghikai kumno ban ai buiñ ia i khun, ka jingkongsan ban shim ia ki dawai tika bad kiwei kiwei kiba iadei bad ka longkmie kaba punkhun.
Ia katei ka scheme la sdang mynta u snem bad haduh mynta ki don 129 Transit Home ha kylleng ki bynta jongka jylla ha kaba palat 600 ngut ki longkmie kiba punkhun kiba shitom jur kila ioh jingmyntoi.
Kawei na ki daw ba ki kmie ki kwah ban kha khun ha ïing ban ha ki jaka sumar kadei namar ba kim kwah ban ieh bun sngi iala ki khun hala iing hynrei katei ka skhim ka pynthikna ba ki kmie kim donkam ban ieh iala ki khun ha ka jingbym don ki nongpeit nongsumar hynrei haka Transit Home ka don iaka jaka kaba biang na ka bynta ki khun bad ki nongap ruh.
Ka Tira T Sangma ha kaba nyngkong kala kyrngah ban leit kha khun hapoh ka jaka sumar hynrei haba kala iohsngew ba ka don ka jingma ha ka jingpun khun bad da ka jingpynsngewthuh u kurim jongka, kumta kala mynjur ban phah sumar.
Kala don mynta la 5 sngi hapoh Transit Home bad kan hap ban ap sa 5 sngi ia kana la buh tarik ba kadei ka sngi ba kan kha ia i khunlung bad ha ka sien kaba nyngkong ka sngew ba ka sngewshngaiñ ban kha khun.
