Shillong, Risaw 23 : U Myntri Sorkar bad MLA ka South Shillong Bah Sanbor Shullai, ha ka sngi saitjain, ula plie paidbah ia ka Greenery Park jong ki Khynnah ba dang shu shna thymmai ha Madan Laban, kaba la tei ha ka jinglut jingsep ba kot T.55.35 lak.
Ia kane ka park ki khynnah la mang lyngba ka Atal Mission for Rejuvenation and Urban Transformation (AMRUT) Scheme 2021-2022 jong ka Sorkar Pdeng.
Ha kane kajuh ka sngi, u Myntri ula buh ruh ia u mawnongrim ban shna ia ka surok iaid kali ba pyniasoh na ka surok PWD sha Raid Laban Forest ha Madan Laban, kaba la mang haduh T.83.73 lak n aka SPA State Scheme.
Ia kine ki jingialang la pyniaid da ka MCIC jong ka South Shillong Constituency ha ryngkat ki Dorbar Shnong ka Madan Laban-Riat Laban.
U Bah Sanbor haba ai jingkren, ula kyntu ia baroh ki nongshongshnong ban pynkhlain ia ka jingiaieid bad burom markylliang kum ki para nongshongshnong ym ban wanrah ia ka jingsngew iapher jingmut.
Baroh ki nongkren kila iaroh ia ka jingtreikam ba khlem shongthait jong u MLA ha kaban wanrah ia ki skhim bad kam pynroi bapher bapher ha Greater Madan Laban- Riat Laban bad ha ka Constituency baroh kawei.
