SHILLONG, Risaw 21: Ki don haduh 8020 tylli ki kam ba thylli ha ki tnat treikam bapher bapher jong ka sorkar jylla.
Ia kane la pyntip da u nongwad RTI u bah Disparsing Rani haka jingiakren bad ki lad pathai khubor.
U bah Disparsing ula iathuh ba ki kam ba thylli ki kynthup ha ka tnat pulit haduh 2477, ha ka tnad Meghalaya Electricity Corporation Limited (MeECL) ki don 2320, ha ka tnad ka koit ka khiah ki don 749 bad ha kiwei kiwei ki tnad sorkar.
Ula iathuh na kine ki 8020 tylli ki kam ba lait hapoh ka jylla, ki don ruh haduh 367 tylli kiba lait hapoh ka North Eastern Indira Gandhi Regional Institute of Health and Medical Sciences (NEIGRIHMS).
“Ka jingpyntip jong u myntri rangbah ka jylla u Conrad Sangma ha ka dorbar thawaiñ ha kine ki bnai ba la dep ba ki don 3000 tylli ki kam ba lait hapoh ka jylla ka long kaba bakla namar lyngba ka RTI nga la shem ba ki don palat 8000 tylli ki kam ba lait” la ong u bah Disparsing.
U bah Disparsing ula kynnoh baka sorkar jylla naduh u snem 2018 haduh mynta kam pat thung kam bad kane ka long kaei kaei kaba khanglang iaki samla ka jylla ban duh kam khamtam ha kum kane ka juk mynta ba ki samla kila kiew bha haka pule puthi.
“Kam myntoi ban iakren bad ban dawa naka sorkar ban thaw lad ban ai kam iaki samla namar wat iaki kam ba thylli palat 8000 tylli kiba ka sorkar ka la dep ban mang ruh kam lah ban thingkam ne pyndap” la ong u bah Disparsing.
