Nongpoh, Nailur 29: Ka Ri-Bhoi Youth Development & Social Organisation (RBYDSO) ha ka sngi Ba-ar, kala dawa ia ki bor district ba kin phah weng lut ia baroh ki kali jot kiba pynieng harud jong ka surok bah.
Kane ka seng hapoh ka jingialam u President samla Arnold Syngkli, kala iakynduh ia u Deputy Commissioner bad Superintendent of Police ka District, ban pynpaw ia ka jingsngewkhia halor ka jingdon ki kali jot ha shi lynter ka surok bah NH-06 ha Nongpoh, kaba la pynsniew dur ia ka sawdong sawkun.
Kat kum ka jingong kane ka seng, kiba bun na kine ki kali jot ki dei ki kali ba aksiden ne kiba kurup da ki Pulit na ka Nongpoh Police Station.
Haba kren sha ki lad pathai khubor, u samla Arnold u la ong ba ka jingdon jong kitei ki kali kiba la sniew bad kiba la jot harud jong ka surok ka pynwit iaka iaid ka ïeng jong ki paidbah bad ka lah ruh ban wan rah ruh iaki jingjia aksiden namar ka jingkhap niah jong ka lynti ïaid.
U la ong, kitei ki thanad pulit kiba pynïeng ia kitei ki kali jot kim ikop shuh kum ki jaka treikam jong ki pulit la iohi pynban kum ka karkhana shna kali namar ka jingbun ki kali kiba la sniew ba buh ha kitei ki jaka.
Ka RBYDSO ka kyrpad iaka tnad pulit bad khamtam iaka bor district ba kan pynkynriah noh ia kitei ki kali jot sha kiwei pat ki jaka khnang ba kan wanrah ïaka jingkhuid jingsuba bad khamtam jingshngaiñ haka iaid ka ïeng ki paidbah.
