Shillong, Risaw 20: Ki samla pule ka skubah North Eastern Hills University (NEHU) hynne ka sngi palei kila mih ban dawa ba dei ban pynneh iaka jingai bhah kyrpang ba 10% iaki trai jylla ban ioh rung klas ha NEHU.
Kila samla pule trai jylla ka NEHU haka jingialam ka NEHU Student Union bad ka Khasi Student Union (KSU) NEHU unit kila pynlong ka jingiaid paidbah naka ophis treikam jong ki shaduh ka Multi-use Convention Hall jong ka skulbah ban dawa ba dei ban pynneh iaka 10% ka bhah thep klas ia ki trai jylla kata ki Khasi, Jaintia bad Garo.
Lah ban kdew ba mynta ka sngi u Vice Chancellor (VC) ka NEHU ula lum ka jingialang jong ka academic council naka bynta ban iathir iaki kam kiba iadei bad ka skulbah kynthup haba iadei bad ka 10%.
Haba kren ha kane ka sngi, u Finance Secretary ka NEHUSU samla Wailad Siangshai ula ong ba ki samla pule ki ioh jingtip baka NEHU ka thmu ban pynduh noh iaka bhah kyrpang kaba 10% daka bujli noh daka 10 Points ne Marks ban ai iaki trai jylla naka bynta ban thep klas ha NEHU.
U samla Wailad ula ong ba ki samla kila sngewkhia halor ka kynrum kynram ka jingpynrung klas hapoh NEHU lyngba ka CUET namar kane kan buh jingeh ia ki samla trai muluk kiba thmu ban wan pule ha NEHU ha ki snem ban wan.
“Ka jingiaid paidbah sha kane ka Hall ba don ka jingialang jong ka Academic Council ka NEHU kadei ban pynsngew sha u VC ba udei ban pynthikna ban pynneh iaka bhah kyrpang kaba 10% lane ka Weightage kaba la mang naka bynta ki samla pule trai jylla ban ioh thep klas ha NEHU” la ong u samla Wailad.
