Shillong, Risaw 20: U Working President ka People’s Democratic Front (PDF) u badei ruh u Myntri ka tnat ka rep bah Banteidor Lyngdoh ula ong ba ka jingthmu phet seng ki 2 ngut ki MLA kan ym don jingktah satia ia ka Party ha ka election 2023.
Lah ban kdew ba ki 2 ngut ki MLA ka PDF ba kynthup u Myntri ka tnat C&RD bah Hamletson Dohling na Mylliem bad u bah Jason Mawlong na Umsning konstitwensi ki lah ban mih noh na ka party bad ban iakhun iaka ilekshon 2023 naka National People’s Party (NPP).
Haba kren sha ki lad pathai khubor u bah Banteidor ula ong ba kan ym don satia ka jingktah iaka party namar ka party kala pynkhreh bad kala ithuh iaki kyrtong ki ban iakhun iaka ilekshon 2023 na kine 2 ki konstitwensi jong kine 2 ngut ki MLA kiban sa phet noh.
“Kan nym don ka jingktah iaka party namar ka party kala don lypa ia ki kyrtong ki ban iakhun haka ilekshon 2023 na kine ki konstitwensi ba shah ieh noh ha ki MLA ba mynta” la ong u bah Banteidor.
U bah Banteidor ula ong ba ki paidbah kin sa bishar haka ilekshon 2023 namar haduh mynta kam pat ju don ka jingshah kynnoh bam sap ha ki 2 tylli ki tnat ba bat ka PDF namar kum u Myntri ka tnat ka rep ka riang bad kum u Myntri ka tnat ialehkai ula ialeh katba lah ban wanrah jingmyntoi iaki paidbah ka jylla.
