Resubelpara, Risaw 20: U Myntri ka koit ka khiah ka Jylla James PK Sangma hynnin ka sngi Balang, ula buh ia u mawnongrim ban kyntiew kyrdan noh ia ka Kharkutta Primary Health Centre (PHC) sha ka Community Health Centre (CHC).
The upgrade will prove to be beneficial to the people of the area, aid in providing much better medical facilities to those in need and address important health issues. This will also contribute to improving the overall health scenario of the region. pic.twitter.com/dEDGJfqmOq
— James K Sangma (@JamesSangma1) October 19, 2022
Ia une u mawnongrim la buh ha ka jingiadon ryngkat u MLA ka Resubelpara bad Symbud Lamphang ka Iingdorbar Timothy D Shira, MLA ka Bajengdoba bad Kharkutta Pongseng Marak bad Rupert Momin.
Haba ai jingkren kum u kongsan, u James ula ong ki jingeh kiba mih ha ka por jong ka khlam Covid-19 kala pynlong ia ka sorkar ban sngewthuh ia ka jingdonkam ban don ki jaka sumar kiba biang ki tiar ki tar ha Jylla, ban ai jaka sah ia bun ki nongpang.
U ong baka jingkyntiew kyrdan ia ki PHC sha ki CHC bad ka jingpynjanai bad pynkhlain ia ka jingshakri jong ki jaka sumar ka dei ka kam bala shimkhia bha da ka sorkar khnang ban pynthikna ba ki nongshongshnong ka Jylla kin ioh ia ki lad jingsumar kiba paka.
Ka jingwan iakren bad khlem shongthait jong u MLA ka Kharkutta u Rupert Momin halor ka jingdonkam ban kyntiew kyrdan ia ka Kharkutta PHC sha ka CHC bad da ka jingsngewthuh ia ka jingdonkam ba hakhmat duh jong ki paidbah, ula maitphang ia ka jingkyntiew kyrdan ia kane ka jaka sumar.
Hadien bala pyndep, kane ka CHC kan lah ban don haduh saw ngut ki doktor specialist, ki jaka sumar kiba biang ki tiar ki tar bad kumjuh ruh yn pynbun ia ki jingthiah haduh 30 tylli.
Haba kren halor ka jingsiew da ki kor digital, u Myntri ula ong ba ka jingeh ha kaba siew slem sha ki nongtrei ASHA ka dei kaba la lah ban pynbeit mynta. Ula ong ba ka Sorkar kala pyrshang ruh ban pynjanai shuh shuh ia kane ka rukom siew ia ka bainong jong ki nongtrei.
Haba kren halor ka jingduna ki Doktor khamtam ki Specialist, u James ula ong ba ka Sorkar Jylla iasoi ia ka MOU bad ka Sorkar Taminadu ba kin ai jinghikai pyntbit ia ki doktor jong ka Jylla. Ula pyntip ba shen ka Jylla kan sa don noh iala ka jong ka Medical College ha Shillong ban lah pyndap ia ka jingduna doktor ha Jylla bad ruh ia ka Recruitment Board ka ban pynsted ia ka jingthungkam ia ki doktor bad ki nos.
U James ula pyntip ruh ba ka Sorkar ka dang pynkhreh mynta ban thaw ia ka Medicine Procurement Agency khnang ban lah leh eiei noh halor ki jingeh na ka jingduna dawai ha ki jaka sumar.
Kiwei pat kiba la kren ki kynthup ia u MLA ka Kharkutta bad Chairman ka MNREDA Rupert Momin bad u MLA ka Bajengdoba Pongseng Marak uba la pyntip ba shen ka Sorkar Jylla kan sa kyntiew kyrdan noh sa ia ka Bajengdona PHC sha ka CHC.
