Tura, Risaw 20 : Ki Pulit ka Anti Narcotics Task Force (ANTF) ka West Garo Hills, kila ioh ban kem ia uwei u nongkhaii droks bad ioh kurup haduh 5.58 gram u heroin.
Kat kum ka jingpyntip u Superintendent of Police ka West Garo Hills V.S Rathore, ka ANTF kala pynlong ia ka jingkhynra naduh hynnin ka step halor ka jingioh khubor shaphang une u nongkhaii droks hynrei dei hadien 12 kynta, kila ioh ban bat ia une u briew.
Une u nongkhaii droks u kyrteng u Sagar K Marak ba 23 snem bad na ka met jong u, la ioh ban kurup ia u heroin ba 5.58 gram, 46 tylli ki bitor plastic barit, ka pisa ba 200 bad kawei ka mobile phone.
Ia une u briew la register case ha Tura Police Station bad la pynngat ia u hapoh ka kyndon NDPS Act. Ka jingtohkit mynta kala iaid shakhmat.
