Itanagar, Risaw 19 : Ka People’s Party of Arunachal (PPA) kala ong ba kan pynthikna ba la kumno kumno ruh kane ka party ka dei ban ioh thaw ia ka sorkar hadien ka ilekshon assembly ka ban long ha u snem 2024.
Haba aijingkren sha ki lad pathai khubor hapoh press club hynnin ka sngi Nyngkong, u vice president ka PPA u advocate Rigam Santhana ula ong ba ka party kan iakhun ha baroh ki 60 tylli ki assembly seat bad ban pynthikna ba ki dkhot jong ka party PPA kin ioh ban thaw ia ka sorkar.
Nalor kata ula ong ruh ba kane ka party kan pynthikna ruh ba la kumno kumno ruh kin ym don kiwei pat ki national party ki ban jop ha kane ka ilekshon na ka bynta ban thaw iala ki jong ki sorkar.
Kumta ruh u kyrpad jur ia ki samla nongialam, ki samla pule lem bad kiwei pat na ka jylla ba kin pyniasoh sha ka jingpynrung dkhot ka ban sa sdang shen.Ula ong ba ki paidbah nongshong shnong ka jylla ki dei ban tip bad ki rukom treikam jong ka BJP kim dei satia na ka bynta ka bha ka miat jong ka jylla. “Ki party kum ka Congress bad ka BJP kila iai bteng ban lehklet ia ki jingeh bad ki jingangnud jong ki samla bad na ka bynta ka bha ka miat jong ka jylla,” ula ong shuh shuh.
“Kane ka sorkar jylla kaba mynta ka kham pynleit jingmut ha ki kam bamsap bad ki kam ioh nong shimet.Ki kam bamsap kila nang khie rasong naduh ba ka sorkar BJP kala shimti ia ka jingsynshar ha ka jylla.Kumta ngi dei ban rat diengkhong ia ki national party na ka jylla bad ban pynshlur ia ki party riewlum,” ong shuh shuh utei u nongialam ka PPA.
Ha kajuh ka por ula pyntip ruh ba kane ka party kam shym la treikam mynta lah kumba katto katne snem namar ki katto katne ki kam pohiing.Hynrei watla katta, dang shen ia kane ka jingeh la lah ban weng noh bad la ioh ia ki dkhot kiba thymmai ha ryngkat u president bad secretary jong ka party.
Kumta ruh ka PPA ka la lah biang ban pyniaid shakhmat ia ki jingtrei ki jong ka da ka jingthmu ban tehlakam bad khanglad ia kane ka sorkar bamsap ha kane ka jylla hapoh ka jingsynshar jong ka BJP, ula ong shuh shuh.
