Shillong, Risaw 19: Ka OPUS Productions ryngkat bad ka tnad Tourism kila pynbna ba kin pynlong iaka Shillong Autumn Festival ka ba-ar sngi ha Umiam Lake Resort haka 29 bad 30 tarik mynta u bnai.
Ka Nongseng jongka OPUS & Communications Head ka Kong Alethea O’Neal Kynta ka la ong,“Ka mat jong ka jingrakhe iaka Shillong Autumn Festival mynta u snem ka long “empowering the youth” bad ka thong kaba hakhmat ka long ban tei bad ban pynlong iaka Shillong Autumn Festival kum ka Music & Cultural Festival ka ba heh haka thaiñ shatei lam mihngi kum ka Hornbill, Zero, bad kiwei kiwei”
Kala ong, ba ka Shillong Autumn Festival ka dei ka tamasa kaba la khring bha ia ki nongjngohkai ha ki snem kiba la dep ha ka ba ki nongpeitkai ki ba lawan ki la kot shaka 4000 tam.
“Mynta u snem, kane ka tamasa ka ban wanrah da ka tnad Tourism (ryngkat ka jingkyrshan jong ka CMO & sorkar Meghalaya) kan long kaba heh bad kaban dap da ki jingpynbyrngia kiba bun jait na ka bynta ki longiing longsem naduh ka rwai bad shad tynrai, ka jingdie ia ki jingbam tynrai, ki jingshna bad ki jingthaiñ tynrai, ki jaka ialehkai, ki kynhun tem, ka Fashion Show, DJ bad kiwei kiwei” ong ka Kong Kynta.
Ha ka sngi sdang jong ka tamasa yn pynshongshit ia ki paidbah da ka kynhun ReChords, Strait Brothers, B4SHAN X Lily, The Prophets (Mizoram), Summersalt, DJ Meban bad MOJI (Australia).
Katba ka kynhun Rhem, Imprints, Sonic Vibration, Lynx, L B King, Rum and Monkeys, Bombay Bassment (Mumbai), About Us (Nagaland) bad kiwei kiwei kin pynshongshit haka sngi kut jong ka tamasa.
Ha kane ka tamasa synrai yn pynlong ruh iaka Fashion Show ha ka ba yn pyni nam ia ka riam ka beit da u Fashion Designer u Bah Arif Mukhim & Dance Sequences na ka Team Phoneix kaba la ialam daka Anniesha Mawrie.
Kin don ruh ki jingpynbyrngia naka bynta ki khynnah ha kaba kan don ka Kids Zone ha kaba ki khynnah ki lah ban iashimbynta ha ka Inflatable Games da ka Fun ‘n Thrills Park, Face Painting da u Batliakor Laitthma, Temporary Tattoos da u Raphael Garette Thangkhiew, ka jingdie iaki tiar ialehkai, Balloons, Sweets bad kiwei kiwei da ka Delilah’s Chemera Store & the Party Starters Store.
Kiwei pat ki jingpynbyrngia ki kynthup iaka Games Section ryngkat ka jingiatreilang bad ka XSports kaban kynthup iaka Paintball Target Practise, Wheels of Fortune, Archery & Hot Air Balloon Rides, Photobooth Area na ka bynta ban shondur bad ruh ban ioh noh iaka dur kba shong hangto hi bad ka jingpyninam da ka Riti Academy of Visual Arts bad ka Booth jong ka Meghalaya Tourism Development Corporation na ka bynta ban phong ia ki riam tynrai.
Ka Shillong Autumn Festival kan don ruh iaka Makers` Market ha kaba yn pyninam ia ki jingthain tynrai, ki riam tynrai bad ki jingtah kiba lah ban ioh na ka The Craft Collective, MTDC Handicraft Stall, Omil Farms, Fashionable Merchandise Stall, Body Bodh Store & Eve’s Boutique Store.
Nalor kane kan don ruh ka jaka bam jong ka Chicken Wagon, Baking Leaven, Memorial Taste, Café Sola, Meaty Delights, Mama’s Café, Eden Restaurant, The Blue Ribbon Bakery, Luzia’s Kitchen & ka dukan bam na Mizoram jongka Sekibuhchhuak Food Industry bad kin don ruh ki jaka bam kyrpang kiban die ia ki jingbam tynrai jong ka jylla Meghalaya
