Guwahati, Risaw 17 :Ki pulit ka Assam hynne ka sngi Nyngkong kila nang lapdien shuh shuh ia ki jingtreikam jong ka kynhun seng lehnoh Al-Qaeda in the Indian Subcontinent lane ka AQIS da kaba ioh ban kem biang sa sawngut ki briew kiba kynthup ia u nonghikai jong ka skul Madrassa.
Ia kine ki lehnoh AQIS lah ioh ban kem ha ki artylli ki jingkhynra, kata kawei ha Tamulpur bad ha Nalbari District ka Assam, ong ka tyllong khubor pulit.
Ha ka jingkhynra kaba la long ha Tamulpur, ki pulit Assam kila ioh ban kem ia arngut ki dkhot jong ka kynhun seng lehnoh Ansarullah Bangla Team (ABT), ia kaba ki pulit kila kam ba ka dei ka bynta jong ka kynhun AQIS.
Uwei napdeng kine kiba la shah kem u dei u nonghikai jong ka skul Madrassa.Ia kine ki briew ba la ioh kem la tip kyrteng kum u Saddek Ali, 38 snem rta uba dei na Howli Barpeta bad uba dei ruh u nonghikai hapoh kawei ka skul Madrassa ha Dongargaon.
Katba uwei pat u dei uba la tip kyrteng kum u Jakibul Ali 23 snem rta uba trei ha ki kam lajong kiba rit ba ria ha Namati kaba hapoh Nalbari district ka Assam, ong shuh shuh ka tyllong khubor pulit.
Ki tyllong khubor pulit kila ong shuh shuh ruh ba kine ki arngut kiba la shah kem la ong ba ki dei ki dkhot jong ka ABT bad ka AQIS hapoh Assam bad ba kila pyndep ia ki jingtreikam ki jong ki lyngba ka Madrassa.
Ia kine la pynngat ha ki kyndon ain bapher bapher jong ka IPC bad kumjuh hapoh ki kyndon jong ka UAPA.Ha kawei pat ka jingkhynra, kiwei pat ki suba dkhot jong ka kynhun ABT kiba kynthup ia u Habel Ali bad u Abu Raihan 26 snem rta kila shah kem noh ha ki bor pulit ka Nalbari halor kijuh ki jingkynnoh kam lehnoh.
