Shillong, Risaw 17: U President ka BJP-Meghalaya Bah Ernest Mawrie hynne ka sngi nyngkong, ula pynpaw ia ka jingsngewnguh ia u Myntri Rangbah Duh ka Ri u Narendra Modi halor ka jingshimkhia ia ki jingdonkam jong ki paid nongrep ka Jylla Meghalaya.
Ha ka kyrwoh, u Bah Ernest ula ong, ka dei tang ka sorkar BJP kaba dei shisha na ka bynta kiba duk, bad kaba shimkhia ia ki jingdonkam ka imlang sahlang la ka dei ki nongrep ne mano mano ruh.
Ka Sorkar BJP ha Delhi, hapoh ka jingialam u Narendra Modi hynne ka sngi kala pyllait ia ka Installment ba 12 ba T. 2000 sha ki Longiing jong ki Nongrep hapoh ka Pradhan Mantri Kisan Samman Nidhi (PM-KISAN) scheme.
Ha kane ka skhim, la ai T. 6000 shisnem kum ka jingkyrshan sha baroh ki nongrep ba don jaka rep hapoh ka Ri. T.2000 la phah beit beit sha ki bank account jong ki nongrep lai sien ha ka shisnem na kane ka skhim.
Ka Meghalaya ka dei kaba iohnong bun eh na kane ka skhim. Palat ia 2.05 lak tylli ki Longiing jong ki nongrep na Meghalaya kila ioh ia ka pisa na kane ka skhim, kaba la ai jingmut ym duna ia ka 8 lak ngut.
