Shillong, Naiwieng 20 : Hashuwa ka jingwan jong ka National Games ha u Lber 2027, ka Sorkar Jylla kan pyniaid shakhmat ia ki kam ha kaban tehlakam ia ka jingpei ki pipe um ha Shillong bad ban siang rong thymmai ia baroh ki surok, ong u Symbud Myntri Rangbah ba khmih ia ka tnad PWD (Roads) Bah Prestone Tynsong ha ka sngi Thohdieng.
U Bah Prestone ula pyniaid ia ka jingialang bishar kam lang jong ka tnad PWD (Roads), PHE bad ka Shillong Municipal Board (SMB) ban pynbeit ia ki jingeh kiba mih na ka jingsiang ia ki pipe um bad ka jingpei um ha kylleng ka sor.
“Mynta ka sngi nga la khot ia ka jingialang bishar kam lang hapdeng ka tnad PWD (Roads) bad PHE bad ruh ka SMB, ban iapyrkhat kumno ban leh eiei halor ki jingeh kiba don mynta, ki jingtynjuh ba don hakhmat, naduh kaba siang ia ki pipe um” ula ong.
Ula ong ba ka jingpei ki pipe um ka dang dei ka jingeh kaba dang iai bteng ha kylleng ka sor Shillong, la ki dei ki pipe um jong ka SMB lane ka PHE, kaba pynlong kongsan ia kane ka jingialang bishar kam.
“Ngi iakren halor ka jingpei ki pipe um ha kylleng ka sor Shillong la ka dei ka um jong ka SMB ne ka PHE. Kumta, nga sngew donkam ba ngi hap ban shong bishar kam mynta ka sngi bad ha kane ka jingialang, ngi la shim ia katto katne ki rai kiba donkam” ong u Bah Prestone.
Kum shibynta jong ka rai, yn sa thaw ia ka kynhun ki Ophisar na kine ki lai tylli ki tnad ba kin iatreilang haba leit khmih ia ki pipe um bad peit thuh ia ka rukom siang ia ki pipe um. Kane ka sienjam kala mih naba ki kam jong ka Greater Shillong Water Supply Scheme ki dang iaid mynta, bad ka jingsiang ia ki pipe um ki dang sahteng ha ki katto katne ki shnong bad don ruh ki ban dang sdang.
Mynta bala dei ka aiom treikam, u Bah Prestone u ong ba ka PWD ka thmu ban pyndep shisien leh ia ka jingsiang rong thymmai ia ki surok kiba kongsan ha Shillong shuwa ka National Games.
“Ngi la shim ia ka rai ba ha ka 24 tarik Naiwieng, u Superintending Engineer ka tnad PWD bad PHE bad kumjuh ruh u CEO ka SMB, kin pynlut por baroh shisngi ban leit jurip ia kito ki jaka ba pei ki pipe um bad ban shim ia ka rai hangto hangto hi, kat haba donkam” ula ong.
“Kane ka dei ka rai bala shim mynta ka sngi kum ka jingpynkhreh ia ka National games, ka ban sa long ha u bnai Lber 2027” ula bynrap.
Halor ka mang tyngka, u Bah Prestone ula iathuh ba kumba T.45 klur la mang ha u snem bala lah ban siang rong thymmai ia ki surok ka sor Shillong hynrei kane ka pisa ka lah ban nym pat biang namar ki don ruh ki jaka ba hap ban khmih lang.

