Nongpoh, Risaw 17: Ka Federation of Khasi Jaintia & Garo People (FKJGP) – North Khasi Hills District hynne ka sngi nyngkong, kila hiar jurip ia ka surok PMGSY ba pyniasoh na Umling sha Umling Lambrang, kaba la shu ieh bad khlem pyndep shuh ia ka jingsiang rong da u Contractor naduh u snem 2018.
Ka FKJGP-NKH hapoh ka jingialam u Vice President Bah Marshal Diengdoh bad u President ka Umling Circle Bah Banroi wahlang, kila leit iakynduh ruh ia ki bor khmih jong ka Tnad Public Works Department (PWD) ban dawa tuklar ia kane ka kam bad ban bthah ia u Contractor ba un trei pyndep noh mar mar ia kane ka surok.
U Bah Marshal haba kren sha ki Lad Pathai Khubor, u la pynpaw ba ka seng hadien ba ka la iohlum ia ka jingujor na ki paidbah ia kane ka jingbuhteng u Kontraktor ban pyndep ia ka jingsiang rong ia ka surok , kala shimkhia ban leit jurip ia katei ka surok bad kala lap ia ka jingshisha ha kaba bun ki bynta ym shem la pyndep ia ka jingsiang rong kumba la mang na ka skhim PMGSY.
U la iathuh ruh, ba ka seng ka la lap ba ka jingpyntrei ia kane ka surok kam shem la pyndep katkum ka por ba la buh da ka tnad PWD bad namar kane, ka seng ka dawa ia ka Tnad PWD ba kan tuklar bad leh eiei noh mardor.
