Guwahati, Naiwieng 18: U National President ka Vishwa Hindu Parishad (VHP) u Ashok Kumar u la ban jur iaka jingdonkam ia ka ain kaba pyrkhing pyrshah ia ka jingpynkylla niam ha Assam, da kaba kynnoh ba ka jingpynkylla niam lyngba ka jingthok, jingpynbor ka jia ha ki bynta jong ka jylla.
Haba kren ha ki nongthoh khubor ha Guwahati, u Kumar u la ong ba ka sorkar jylla ka la dep ban shim khia ban khanglad ia ki katto katne ki kam pynkylla niam, kynthup ia ka jingkhang ia ki ‘Changai Sabhas’ bad ban khanglad ia ki Missionary kiba nabar ban rung sha ki shnong da ki Tourist Visa ban pynphriang ia ka niam.
Hynrei u la pynskhem ba kine ki lad ki lynti kim pat biang bad u la kyntu ia ka sorkar ban wanrah ia ka ain kaba khlain kaba don ia ki kyndon ban pynshitom tyngeh ia kito kiba donkti ha ki jingpynkylla niam beain.

U Kumar u la pdiang ruh ia ka jingmynjur jong ka sorkar Assam ia ka Uniform Civil Code (UCC) Bill, ha kaba u la batai ba kane ka dei ka sienjam kaba kongsan na ka bynta ka hok bad ka jingiaryngkat hapdeng ki kynthei bad shynrang.
U la pynpaw ka jingkyrmen ba ka President kan ai jingmynjur shen ia kane ka Bill, kaba plie lad ban pyntreikam ha ka jylla.
U Kumar u la pynbna ruh ia ka jingialap paidbah bad lum pisa na baroh kawei ka ri ban rakhe ia ka jingdap shispah snem jong u nongialam barim ka VHP u Ashok Singhal.
Hapoh kane ka jingthmu, ki nongtrei VHP kin leit sha ki thliew ïing bad pan jingnoh synniang kaba T.20 na ki paidbah da ka ba buh thong ban poi sha ka shi klur ngut ki briew.
Ha kaba iadei bad ka jingiada ia ki masi, u Kumar u la pdiang sngewbha ia ka ain iada masi jong ka Jylla hynrei u la ban jur iaka jingdonkam ban don ka jingiatreilang kaba kham khlain hapdeng ka sorkar, ka imlang sahlang bad ki nongialam niam ban iada bad ban khanglad ban pyniap masi.
U la pynpaw ruh ïa ki jingsngewkhia halor ka jingshalan tuh bad jingpynïap masi sha sha Bangladesh, da kaba ban jur ïa ka jingdonkam ban ïatreilang ban weng ïa kane.
U Kumar u la ong ba ka jingïada ïa ka jinglaitluid ha ka niam, ka jingkhanglad ïa ki jingpynkylla niam be-aiñ bad ka jingpynkhlain ïa ka jingïatylli jong ki riewngeit Hindu kin dang dei beit ki mat ba kongsan jong ka VHP.

