Shillong, Naiwieng 18 : Ki Nonghikai College ha kylleng ka Jylla Meghalaya ha ka sngi Balang, kila pynlong ia ka jingiakhih da kaba rah lama iong kum ka dak ka jingkyrshan ia ka Khasi Jaintia Deficit School Teachers’ Association (KJDSTA) ba dang iakhih mynta bad ban pynrem ia ki jingkynthoh u Symbud Myntri Rangbah Bah Prestone Tynsong ba niew ia ki nonghikai kum ki kruin bad sohpyut.
Ka MCTA ka iathuh ba ka jingiakhih ka long kaba iaid beit iaid ryntih ha baroh ki college kiba iashim bynta, bad ki nonghikai kila deng ia ki lama iong, bad pynlong ia ka jingiakhih ba jai jai hala ki jong ki jaka pule.
Ki college kiba iashimbynta ki kynthup ia ka Union Christian College, College of Teacher Education (PGT), St Mary’s College, Mendipathar College, Lady Keane College, Shillong Commerce College, Sankardev College, Shillong College, St. Anthony’s College, Synod College bad Ri Bhoi College.

“Ka jingiakhih rah lama iong kam dei eh tang ka jingpyni ia ka jingpynrem hynrei ka jingpynpaw lang ba ia ka burom, ka hok bad ka bha ka miat jong ki nonghikai dei ban burom bad ban pynneh pynsah” ong ka MCTA.
Ka MCTA ka ong ba ki jingdawa kiba la pynpaw da ki nonghikai skul kim dei ki jingdawa kiba khlem nongrim lane ki jingialeh pyrshah ïa ka Sorkar Jylla, hynrei ki dei ki mat kiba la slem bha kiba ïadei bad ka jingpyntreikam ïa ki polisi, ki kyndon shakri bad ki hok kiba dei hok ban ïoh, kynthup ïa ka CPF bad NPS, ka jingpyntreikam ïa ka CPF Scheme 2023 bad ka jingweng noh ïa ka Scheme 2026, ka MACPS, ka Structured Pay Framework bad Composite Grant, ka jingbym pynbna ïa ki jinglait kam nonghikai deficit, ki tulop kiba dang sahteng bad ka jingpynslem ban pyllait ïa ka Dearness Allowance (DA).
“Ka Association ka ïeng skhem ha ka nongrim ba ki nonghikai kiba dawa ban ïoh ïa ki hok kiba dei hok ban ioh, ki dei ban ïoh ïa ka jingïakren kaba don nongrim bad ka jingïasyllok kaba don jingmut, ym ban ïoh ïa ki kyntien kiba pynjah burom,” ong ka MCTA.
Ka Association kala ong ruh “Ka bha ka miat jong ki nonghikai bad ka bha ka miat jong ki khynnah pule ki dei kiba iasnoh lang. Kano kano ka jingbteng ban shim noh ïa ki hok bad ka burom jong ki nonghikai kan ym ktah tang ïa ka kam nonghikai, hynrei kan ktah ruh ïa ka jingai jinghikai kaba bha, ka jinglah ban ïoh ïa ka jinghikai bad ka lawei jong ka pule puthi ha ka Jylla,”.
Haba pynskhem biang ïa ka jingkular ban ïeng na ka bynta ka People’s Education, ka Association ka la ong ba ka kyrshan ïa ka rukom ai jinghikai kaba la bei tyngka da u paidbah, kaba baroh ki lah ban ïoh bad kaba shong nongrim ha ka jingngeit ba ka pule puthi ka dei ban shakri ïa ki jingangnud bad jingthrang jong ka imlang sahlang hi baroh kawei.

