Shillong, Naiwieng 18 : Haba kyntait ban kynriah naka jaka ieng Bos kaba don ha Them Iew Mawlong, ki driver bos hapoh ka shatri Khasi Hills Bazar Bus Association (KHBBA) kila pynlong iaka jingiaid paidbah ha Sor bad maham ba kan sa pynjur iaka jingiakhih lada ka sorkar ka dang leh mynthi ia ka jingdawa jong ki.
Kane ka jingiaid paidbah kaba la sdang na ka jaka bos kaba don ha Iew Mawlong bad kila iaid lyngba ka Motphran, Them Bijoy bad ka Old Anjalee Petrol Pump.
Ka Association ka la ong ba ka la kwah ban iaid paidbah shaduh Secretariat, hynrei ki bor pyniaid District ki la pynkylla ia ka lynti iaid paidbah.
U general secretary ka KHBBA u Bah Kyrshan Rynjah u la ong ba ka jingkylla lynti iaid paidbah ki driver ka lah ban dei na ka jinghusiar na ka liang ki bor District.

“Ka jingbym ai jingbit ban ïaid paidbah sha Secretariat ka lah ban long namar ba ki la ïohi kumno kiwei pat ki jingïalang ki long haba la shah ïa ki ban ïaid paidbah sha Secretariat, lane ki la sngewthuh ba ka jingjia ba sngewsih ka lah ban jia, bad ka lah ban dei na kata ka daw,” u la ong bad bynrap ba la bthah ïa baroh ki nongïashim bynta ba kin ïaid daka ba jai jai. “Ngi la bthah ia baroh ki nongiashim bynta ban iaid suk naduh kaba sdang,” u la ong.
U bah Kyrshan u la ong ba ka Association ka ieng hala ka nongrim ban nym kynriah na kane ka jaka ieng bos ba mynta wat hadien ka jingiakynduh bad u Director ka tnad Urban namar ka Sorkar kam shym la lah ban pynbeit ia katei ka jingeh.
Katkum ka jingong jong u, katei ka jingialang ka long tang ban pynlong khroh iaki driver ban kynriah na katei ka jaka, bad ka jaka ieng bos bad ka Sorkar ka tyrwa kaba don pyrshah ia ka Anjali kam long kaba lah ban pdiang.
“Hynnin ka sngi, ngi la pynlong ia ka jingialang bad u Director ka tnad Urban, hynrei kam shym la pynmih ei ei, namar ba ka jingialang ka long tang ban pynbor ia ngi ban pynlait noh ia kane ka jaka. Hynrei ngi la kren shai ba ngi ieng skhem ha ka nongrim jong ngi bad ba ngin iai neh beit ha kane ka jaka,” u la ong.
Da ka por ba la buh ha ka 25 tarik u Naiwieng ban kynriah na ka jaka ieng bos ba mynta, u Bah Kyrshan u la ong ba ka Association kan sa ïakynduh shen ban shim da kiwei pat ki sienjam.
“Ki la ai por ia ngi ba ngi dei ban pynlait ia kane ka jaka haduh ka 25 tarik u Naiwieng,” u la ong. “Nangne shakhmat, ngin sa shim khia lada ka Sorkar kam sngap bad kam pdiang ia ka jingtyrwa jong ngi, bad ngin sa pynlong jingialang bad rai aiu ban leh.”
U la pynskhem ba ka mat kam dei tang shaphang ki nongpyniaid ne ki driver bos, hynrei kadei lang iaka ioh ka kot haki thain nongkyndong kaba iadei bad ka Iewduh. “Lada ngi kynriah na kane ka jaka, ki ban shah ktah nyngkong ki dei ki nongrep bad ki nongkhaïi rit paid ha ki jaka bapher bapher, namar shisien ba ngi la jngai na Iewduh, ka bai kali kan kiew bad ka dor ha ki shnong ki thaw ruh kan kiew,” u la ong.

