Shillong, Naiwieng 16 : Ka Mawpat SC ka la lah ban pynliem da 9-1 pyrshah ia ka Lamlynti FC, katba ka Mawkhar SC ka la lah jop da 1-0 ia ka Sei La Sap FCC, ha ka lympung ialehkai SSA Champions Cup 2026 balong hynne ka sngi nyngkong ha SSA Stadium, Polo.
Ha ka jingialehkai ba nyngkong, u namtam jong ka jingialehkai dei u Thompson Lyngdoh (46’, 51’, 70’), uba la ioh ban thep haduh lai kol bad ka hat-trick kaba ar ha kane ka samoi ialehkai ba mynta jong kane ka lympung.
Naduh kaba sdang, ka Mawpat SC ka la lah ban tehlakam bha ia ka jingialehkai bad ia ki kol kiba sah la iarap ban thep da u Donboklang Lyngdoh (17’, 87’), Denelson Pyngrope (27’P, 74’P), Sparkle Khongshei (35’) bad Dajiedlang Wanshnong (53’).

Ia ka shi kol ban lait brut ka Lamlynti la ioh ban thep ia ka da u Ialam Kshiar (20’).
Lyngba kane ka jingjop, kan pynlong ia ka kynhun ialehkai ka Mawpat SC ba kan ioh ba kan khur 7 point na ki lai sien iakhun ba ka la dep, bud pat sa ka Mawlai SC kaba don ha ka kyrdan kaba ar hadien ba ka la ioh ba kan khur 6 point bad ka Lamlynti ka don ha ka kyrdan kaba lai hadien ba ka la ioh ba kan khur 3 point.
Katba na ka liang ka Mawkhar SC, ka jingjop ia ka Sei La Sap da 1 kol ka pynlong syndon ia ka ba kan kiew sha ka kyrdan kaba ar ha ka Group B.
Ia ka shi kol ba kordor tam ia ka Mawkhar SC, la ioh ban thep ia ka da u Ibanjop Kharjarin (77), ha kaba u la ioh ba un pyndei tiak da la ka jong ka khlieh ia ka bol kaba la wan kham nalor jong u, tad haduh ba rang ap kol ka Sei La Sap u Aiboklang Jyrwa um shim la ioh ban tare shuh ia ka bol kaba la suh beit ngak sha lyndet ka kol.
Hadien kane, u Melbertson Kharbangar u la ioh ban khyrwit jam bha ia ka bol kaba la lait salit ban pynkhih ia ka jar na bynta ka Sei La Sap, bad na ka liang ka Mawkhar mihpaw kawei ka kabu ksiar lyngba u Emanuel Rongrin u bym shim la lah ban pynpar ia ka bol sha lyndet jong ka kol kampher wat haba u la don ha ka jaka kaba paka bha ban pynkhih ia ka jar.

Lashai ka sngi ka jingiakhun ha ka Group B kan long hadpeng ka , Sohryngkham SC pyrshah ia ka Sanmer SC ha ka por 11 baje mynstep ban bynrap pat da ka jingiakhun hapdeng ka Mawpdang SC pyrshah ia ka Nongkrem SC ha ka por 2:30 nohphai sngi kaba dei naka bynta ka Group A.

