Shillong, Naiwieng 16 : Ka Khasi Jaintia Deficit School Teachers Association ha ka sngi Nyngkong, kala kyntait ban pdiang ia ka jingkyrpad u Myntri Rangbah ban pynsangeh noh ia ka jingiakhih bad pynbna ba kan iai bteng beit ia ka jingsangeh treikam ba khlem pud, haba pynpaw ba ka shithi na ka Ophis u Myntri Rangbah kam shym la ai kano kano ka jingkular, ka jingbuhpor bad ka lynti ban pynbeit.
Haba kren hadien ka jingshimrai, u President ka KJDSTA Bah Boswell Pala ula ong ba ki nonghikai kila iakynduh ia u Myntri Rangbah ha ka sngi Palei da ka jingsngewkhia mynsiem bad ka jingkyrmen kaba khraw, hynrei kila wanphai tang da ki jingkular ba yn sa shong bishar.
“Da ka jingsngewkhia mynsiem, ngi pynbna ba ngin pynbteng ia ka jingsangeh treikam jong ngi” ong u Bah Pala bad bynrap “Ha ka sngi Palei, ngi la iakynduh ia u Myntri Rangbah haduh shiteng kynta eiei, bad ha kane ka jingialang ngi la kren ia ki ishu, khamtam haba iadei bad ka skhim 2023 bad skhim 2026 ba kam shong ain”.

U Bah Pala ula iathuh ba u Myntri Rangbah ula kular ia ka kynhun ba un sa khmih ia kane ka kam, hynrei ka shithi kaba la pynbud ha ka por janmiet kam shym la kdew eiei ia ka jingkular.
“Hadien ba ngi iakynduh, u Myntri Rangbah ula kular ha ngi ba un sa khmih ia kane ka kam, hynrei ha ka por janmiet ha kane hi kajuh ka sngi, ngi la ioh pdiang ia ka shithi na ka Ophis u Myntri Rangbah ba kyrpad ia ngi ban weng noh ia ka jingsangeh treikam halor ka nongrim ba u Myntri Rangbah ula sngap ia ki ishu jong ki bad ula phah ia ki sha ka Tnad Education, bad ka tnad Education kan sa shong bisahr ia ka” ula ong.
“Ngim tip shuh sa ia kaei kin shong bisahr, bad hadien kin sa aiti ia ka kaiphod. Kam don sati kano kano ka jingpynthikna” ula ong. “Lano kin pyndep ia kane ka kaiphod? Kumno kan long kane ka kaiphod? Wat u Myntri Rangbah dalade ula kubur ba ki jingdawa jong ngi ki long kiba shai, sa kaei pat ba kin dang bishar?”.
U Bah Pala ula ong ba kane ka shithi kala buh ia ki nonghikai ha ka jingartatien ban shaniah ia ka rukom pyniaid kam.


