Shillong, Naiwieng 13: U Symbud Myntri Rangbah ka Jylla u Bah Sniawbhalang Dhar ha ka sngi Palei ula plie ia ka NTPC Senior National Archery Championship ha ka Archery Ground, Umsawli.
Ia kane ka jingiakob siat khnam la pynlong da ka Archery Association of Meghalaya hapoh ka lama jong ka Archery Association of India.
Haba kren ha ka jingialang kaba la iadonlang ki nongialehkai, nongpyniaid bad ki nongshah khot sngewbha kynthup ia kiba ioh pdiang ia ka khusnam Padma Shri, Arjuna, Dronacharya bad Dhyan Chand bad kiba ioh khur ia ki takma dang shen ha ka Asian Games, u Bah Dhar ula ong, ba kane ka jingiakob ka long ka kaba kongsan bha ia ka Meghalaya ban tei ia ka kynhun bad ia ka jingpyntbit ha ka rukom pyniaid khamtam haba ka Jylla ka pynkhreh ban pynlong ia ka National Games ha u Lber 2027.
Haba pdiang sngewbha ia ki kynhun na kylleng ki bynta jong ka ri, ula ong “Ka Jylla ka jong ngi ka lah ban long kaba rit , hynrei ngi dei pat kiba don ia ka dohnud kaba heh”.
“Nga don ia ka jingngeit kaba skhem ba ka jingwan iashimbynta ki nongialehkai kiba tbit ha ka ri bad ha ka pyrthei kan ai mynsiem ia ki nongialehkai kiba dang samla ka Jylla ban iashimbynta shitrhem ha ka jingiasiat khnam ha kylleng ki district”.
U Director ka Sports & Youth Affairs u Bah Alertson Nongbri, ka Kong Matsiewdor War Nongbri ka nongkitkam jong ka Archery Association of Meghalaya bad Archery Association of India kila donlang ha kane ka jingialang.
Ha ka jingiakhun, u nongialehkai ka SSCB u Dhiraj Bommadevara bad ka Kumkum Anil Mohod jong ka Maharashtra kila wan shakhmat eh ha ka Recurve Qualification.
Ha ka Men’s Recurve Qualification, u Bommadevara ula pynkut da kaba ioh khur 680 point bad ula tam da shi point ia u Parth Sushant Saunkhe ka Maharashtra uba la ioh 679 point.
U Arjun Khara ka Odisha ula wan Balai da kaba ioh 674 point, katba u Devraj Mohaptra jong ka Meghalaya ula wan ba Saw da kaba ioh hi ia katei kajuh ka point, kaba la ai mynsiem ia ka kynhun jong ka jylla ha ka sngi sdang hakhmat jong ki paitbah hapoh Umsawli. U Sukhchain Singh jongka SSCB bad u Paras Hooda ka Haryana kila wan ba San bad ba Hynriew da kaba ia ioh lang mar 672 point.
Ha ka Women’s Recurve Qualification, ka Mohod kala ialam na khmat da kaba ioh 677 point, ka jingtam da 15-point pyrshah ia ka nongialehkai jong ka Jharkhand ka Ankita Bhakat kaba la ioh 662 point. Ka Sangeeta jongka SSCB kala wan ba Lai da kaba ioh 660 Point. Ki nongialehkai ka Maharashtra ka Sharvari Somnath Shende bad ka Gatha Anandrao Khadake kila wan ba Saw bad ba San da kaba ia ioh mar 657 point, ka nongialehkai na Gujarat ka Bhagora Bhargavi Vargishkumar kala wan ba Hynriew da kaba ioh 655 point.
Kane ka sngi kala sdang da ka jingpyniakhun ia ka Men’s bad Women’s Recurve 70m Qualification Rounds, hadien kane la pynlong pat ia ka jingialang plie pyrda ia kane ka lympung iakob ialehkai bad la pynkut pat da ka bynta ka baar jong ka 70m Qualification Round ia ka Recurve Women.
Ia ka Recurve Men’s bad Women’s Team Events ha ka 1/8 bad ia ka Quarter-Final Rounds yn pynlong ha ka 16 tarik u Naiwieng.
