Shillong, Naiwieng 13: Ki bor District ka East Khasi Hills ka la kynnoh ba ki nongiakhih pyrshah ia ka Shillong Ropeway Project ki la pynkhein ia la ka jong ka jingkular bala ai da ka jingthoh hadien ba ki la pynkylla ia ka jingiaid paidbah ba la ai jingbit sha ka jingiakhih shong kyllain mungor hakhmat ka Secretariat.
Katkum ka jingïathuh ka Magistrate, ka Kong Dahun S Lyngdoh, ka Joint Action Committee (JAC) ka la pan jingbit ha ka janmiet jong ka 11 tarik na ka bynta ban pynlong ïa ka jingïaid paidbah kaba jai jai ha ka 12 tarik Naiwieng, da kaba kular ban bud ïa ka lynti, ki kyndon bad ki jingbthah ba la buh da ka ophis Deputy Commissioner.
U Deputy Commissioner u la ai jingbit tang halor kata ka nongrim.
“Ym shah ban pynlong ia ka jingiakhih ne jingialang hapdeng lynti”, la ban jur ka Kong Dahun.
“Ïa ka jingkular halor kane la pdiang bad soi ruh da ka president jong ka JAC.”
Haka bynta ba nyngkong ki nongiakhih kila bud ryntih iaki kyndon bad jingbthah.
Ka jingiaid paidbah ka la sdang ha ka por 1:30 baje janmiet bad kala long kaba jai jai.
Ka jingïaid paidbah kala sangeh ha khyrdop Secretariat.
Wat hapdeng ka jingkyrpad bunsien na ki Magistrate bad ki pulit kiba don ha ka kam, ki nongiashim bynta ki la kyntait ban iaid shakhmat, kala ong.
Ki heh sorkar ki la pyntip ha katei ka jaka ki nong ia shim bynta kila pynkhein ia ki kyndon ai jingbit. Hynrei khnang ban lait na ka jingïakynad, la shah ïa ki ban shong shipor ha khyrdop Secretariat bad la bthah ïa ki bunsien ban ïapra noh.
Ia katei ka jingkhanglad, la ong ki heh sorkar, ki Pulit bad Magistrate ki la kynduh da ka jingsha pyni bor.
“Don na ki nongiashim bynta kiba pyni bor ia ki Magistrate bad ki pulit kynthei” ka la ong. “La kawang ia ki mattress bad la pyrshang ban kyndar iaki jingker kaba lah ban ktah iaka iaid ka ieng ki kali”.
Ka la ong ba katei ka la buh jingma ia ka jingshngain jong ki paidbah ha ka surok kaba bun briew.
Dei hadien ka jingpyrshang kaba iatylli jong ki Magistrate bad ki pulit ba khatduh la lah ban pynkynriah iaki nong iakhih na khyrdop Secretariat.
