Shillong, Naiwieng 12 : U Myntri Rangbah Conrad K Snagma ha ka sngi Palei, ula pynlait ia ka Repair, Renovation and Operationalization Scheme jong ki nongkynti ka Tnad Tourism na ka bynta ka 39th National Games, 2027 bad sam ia ka jingiarap song pisa hapoh ka Enhancement of Wayside Amenities Scheme sha ki nongioh bynta.
Ia kane ka jingialang la pynlong ha Banquet Hall ka Pinewood Hotel, Shillong.
Haba kren ha ka jingialang, u Conrad ula ong ba kane ka skhim ka thmu ban weng ïa ar tylli ki jingeh kiba ki nongshong dukan ha rud ki surok ki ïakynduh, kata ka jingduna ka lad ban ïoh pisa ban ka jingartatien ban kynshew pisa ban shna pynbha ia ki jaka ba ki buh dukan namar ba ka kam jngohkai pyrthei ka don tang ha ki por katkum ka aiom.
“Ki jaka jngohkai ka Meghalaya ki don ha baroh 12 tylli ki distrik. Ki nongwan jngohkai kiba leit na Shillong sha Sohra, Dawki, Nongstoin, Jowai ne Tura ki donkam ïa ki jaka kiba biang ban bam, ban shongthait bad ban pyndonkam ïa ki painkhana kiba khuid ha lynti,” u la ong.
U la bynrap ba ki jaka shongthait ha rud surok ki long kiba kongsan ym tang ïa ki nongleit nongwan hynrei wat ïa ki nongwan jngohkai ruh. “Ka jaka shongthait kaba la pynbha, kaba don ïa ki painkhana kiba khuid, jaka pynïeng kali kaba shngaiñ bad ki jingbam tynrai, ki nang kyntiew ïa ka jingshem jong ki nongwan jngohkai bad ka jingshngaiñ jong ki,” u la bynrap.
Ka Sorkar kan pyllait ïa ka jingïarap song pisa kaba T.5 lak marwei sha ki trai jong 47-48 tylli ki jaka shongthait ha rud surok kiba la jied, kaba kot sha ka palat T.2 klur baroh.
Ki nongïoh jingmyntoi ki dei ki trai jong ki restaurant, dhaba, café, jaka bam bad ki jaka shongthait ha rud surok National Highway, State Highway bad ki surok distrik ha ki khyndai tylli ki distrik jong ka Jylla.
Kane ka jingïarap pisa ka long na ka bynta ban pynbha ïa ki jingdonkam kiba ki nongleit nongwan ki pyndonkam ha ka surok, kum ki jaka shong, ki jaka shet bam, ki painkhana kiba khuid, ki jaka pynïeng kali kiba la buh dak, ki signboard, ki jingshai bad ka jingitynnad jong baroh ka jaka.
Baroh ki nongïoh jingmyntoi ki dei ki trai shnong kiba la dep pynïaid ïa la ki jong ki kam khaii. Kane ka jingïarap pisa ka wan ban pynkhlaiñ ïa ki kam kiba la dep ïaid bad kiba la pyni ba ki don ka jingdonkam, ym ban seng thymmai ïa ki kam naduh kaba sdang.
