Shillong, Naiwieng 8: Ka Hynniewtrep Achik National Movement (HANM) ha ka sngi Saitjain kila leit ban pynpra ia u mawpud uba la sieh da ka Northeast Frontier Railway ha Lat Sohkymphor ha East Jaintia Hills.
U President ka HANM Bah Lamphrang Kharbani ula ong, ba kane ka jingleh kadei ka jingphah ia ka khubor, ba katba ym pat don ia ka aiñ ban iada, ym donkam rel.
“Ai shwa ia ka ILP, nangta ngin sa iakren shaphang ka lynti rel” ong u Bah Kharbani.
Ula ong ba ka Meghalaya kadei kaba la mad lypa ia ka jingiakhun na ka jingwan rung ki briew kiba nabar, wat la ym pat don satia ia ka lynti rel.
“Katkum ka Census ne Khanasamari ha Meghalaya, ngi don kumba 35 lak ne 40 lak duna bad ka Khanasamari kadei kaba dang iaid shakhmat, ki Khasi ki don 15 lak, ki Garo ki don 9 lak, kaba mut kiba tam kidei ki briew kiba wan nabar” ula ong.
“Watla ngim pat don ia ka lynti rel, hynrei kane kadei ka jingwan rung kyrthep ki briew kiba nabar, haba ngi peit ia ka Lad Rymbai, Pynthor, Khyndai Lad, Shalang, ngim lah shuh ban ithuh ba kadei ka jaka jong ki Hynniewtrep Hynniewskum,” ula ong.
“Kata ruh ha ka por kaba ngim pat don ia ka rel, kumta sa katno shuh lada wan sa ka rel” ula bynrap.
U Bah Kharbani ula ai nuksa ruh ia ka Jylla Tripura ba ka long kum ka jingmaham ia kaei kaba lah ban jia.
“Kumta ngi dawa na ka Sorkar India ban ai shwa ia ngi ia ka ILP, hadien kata ngin sa shah ban tei ia ka lynti rel ha Khasi-Jaintia Hills namar kum ki paitbah ngi kren shai ba ngim kwah ban long kum ka nongbah jong ka Tripura, ha ka nongbah jong ka Tripura ki trai shnong kila kylla nongwei hala ka jong ka jaka” ula ong.
“Ngi ngim kwah ban long ki ritpaid ha ka jaka lajong namar ba ngi tip shai bha ba lada beh ia ki Naga kin leit phai biang sha ka jaka ka jongki sha Nagaland, lada u Mizo ruh u shah beh yn leit phai biang sha Mizoram, hynrei shaei ngin leit lada ngi kylla long ki ritpaid ha la ka jongka jaka, namar ba ngi don tang ia ki jaka ha ki rilum Khasi-Jaintia kaba la kyrkhu da u Blei” ula ong.
“Ngi hap ban iada ia ka jaka ka jong ngi namar ba ngim don jaka da kawei pat lada ngi shah beh na kane ka jaka kaba ieid eh ka jong ngi” ula bynrap.
Ula byrngem ruh ia ka Sorkar Jylla bad ia ka Sorkar Pdeng.
“Kumta ngi ngi kren da kaba shai ia ka Sorkar Pdeng bad Sorkar Jylla, lada phi wanrah ia ka rel, ngin ngin pynpra ia ka, katba ngim pat don ia ka aiñ kaba khlian ban iada ia ka jaka bad ia ki paitbah” ula ong.
“Katba ngim pat don ia ka ILP, ka aiñ ban iada ia ka jaka bad lada phi wanrah ia ka rel ngi ngin pynpra ia ka, kata kadei kaba ngi kren shai kdar” ula ong.
“Ngi hap ban pyrkhat na ka bynta ka lawei jong ka pateng ban dang wan, namar mynta khlem ka rel ruh ki briew kiba nabar kila shlei lut, sa katno shuh lada wan sa ka rel” ula ong.
“Ngin kwah ba ngin shah tim ha ki pateng ban dang wan” ula bynrap.
“Katba yn pat ia ia ka ILP, ngin um shah ia ka rel” ula pynbna.
“Ka Sorkar Pdeng bad ka Sorkar Jylla kidei ban sngewthuh ia ka jingdonkam jong ngi ki paitbah” ula ong.
“Ha ki snem kiba lah leit, ngi lah dawa ia ki aiñ kiba khlain kum ka ILP, hynrei phi lah wanrah pynban da ka lynti rel, ngim lah ban pdiang satia ia kane” ula ong.
“Hooid, ngim lah ban kyntait ba lada ka rel kan don ka jingmyntoi, kan pynhiar ia ki dor jong ki mar ki mata, kan pynsuk ia ki samla pule kiba leit ban pule shabar ka jylla, hynrei ka wanrah pat ia ka jingma, ka wanrah ia ka huri hura, jingpynjot ia ka pateng kiban dang wan” ula ong.
“Ka HANM hangne ha Sohkynphor kala wan ban pynpait pynpra, namar ba ka HANM ka kren shai ba khlem ka aiñ kaba khlain kum ka ILP, kan ym pdiang da lei lei ruh ia ka rel” ula ong.
