Amjong, Naiwieng 07 : Ka Sorkar Jylla kala lah ban pynbeit haduh 4,878 na ki 7,079 ki jingud jingnam bala pynsngew da ki paidbah ha kylleng ka Jylla lyngba ka prokram CM-Connect, hynrei kiwei kiwei ki dang sah ban pynbeit, ong u Myntri Rangbah ka Jylla Conrad K Sangma haba ai jingkhein ha ka jingleit iuhkjat ha Amjong, kaba hap hapoh ka Mawhati Block, Ri-Bhoi District, ha ka sngi Thohdieng.
Ha Ri-Bhoi District, 552 tyli na ki 785 ki jingeh bala register lyngba ka prokram, ki dei kiba la dep ban pynbeit, katba 233 ki dei kiba dang sah bad bishar.
Ka jingpyniasoh surok, ka pule puthi, ka scholarship bad ki jaka ai jingsumar ki dang dei ki jingsngewkhia kiba hakhmat eh bala pynsngew daki paidbah ha ka District. Ka jingkhein ka Sorkar kala pynpaw ruh ia ka jingbym don ki Medical Officer kiba thikna ha Mawhati Primary Health Centre, kaba shakri haduh 42 tylli ki shnong bad kumba 26,429 ngut ki nongshongshnong.
Haba kren ha ka jingialang, u Conrad ula iathuh ba ka CM-Connect ka dei kaba la pywandur ban ai ia ka rynsan sha u paidbah ba kin pynsngew ia ki jingeh ba ki iakynduh bad ban iarap ia ki bor synsahr ba kin ithuh ia ki lad ban pynbeit kiba lah ban pyntrei ha ki shnong ki thaw.
Ula ong ba ka Sorkar kan dang bteng ban trei ia ki kam bad ki bor pyniaid ha ki district bad ki block, ban pynbeit ne weng ia ki jingeh bad ki jingud jingnam ba dang sahteng u paidbah bad ban pynkhlain ia ki jingai jingshakri.
Ha kane ka jingialang, u Myntri Rangbah ula sam ruh ia ka jingiarap song pisa ba T.2 klur sha ki 120 tylli ki Self-Help Group (SHG).
U Conrad ula pyntip ba ka Sorkar kala pynlut kumba T.1,300 klur lyngba ka Meghalaya State Rural Liveligood Society (MSRLS) ha kine ki phra snem bala leit noh ban kyrshan ia ki kynhun treikam ki Kynthei ha ki shnong ki thaw bad ki kam ban kyntiew ia ka kamai kajih.
At Amjong in Mawhati Constituency, had the privilege of listening to the people’s concerns firsthand at the CM Connect. Their feedback helps us serve them better and to discuss how we can improve and work together. https://t.co/p8gw79kwIm
— Conrad K Sangma (@SangmaConrad) November 6, 2026
Ka Ri-Bhoi ka don haduh 5,207 tylli ki SHG kaba kynthup haduh 48,401 tylli ki Longiing. Ia kine ki kynhun la wanlang lang ha ki 544 tylli ki Village Organisation bad 32 tylli ki Cluster.
Kumba 5,000 tylli ki SHG ha ka District kila ioh ia ki ram na Bank, kaba kot ia ka T.88.69 klur.
U Conrad ula aiti ruh ia ki kali AGEY ban kyrshan ia ka leit ka wan da ki kali bad ki kam kamai kajih. Ia ka kali la aiti sha ka Shilangkhrui Cluster Level Federation Women SHG Multipurpose Co-operative Society Ltd hapoh ka Umtrai Cluster.
Kum shibynta jong ka prokram ban kyntiew ia ka koit ka khiah ki Kmie bad ki Khunlung, u CM ula sam ruh ia ki tiar sumr sha ki 6 ngut ki Kmie napoh ka Amjong Health & Welness Centre Catchment area. Kine ki tiar ki dei shibynta jong ka Mission 1000 sngi, kaba pynshlur ia ka jingleit kha khun ha ki jaka sumar, ka jingsumar ia ki khunlung, ka jingai buin bad ka jingheh jingsan ki khunlung.
U Myntri Rangbah ula plie paidbah ruh ia ka DA-I-HI textile Unit ha Sohnidan hapoh ka CM-ELEVATE scheme, kaba la pyniaid da u Bah Preciously Shadap bad aikam haduh 15 ngut ki briew.
U Conrad ula ong ba kine ki prokram ki dei kiba thmu ban pynthikna ba ki kam pynroi bad ki jingkyrshan jong ka Sorkar ki poi sha man ki shnong ha kylleng ka Jylla.
