Shillong, Naiwieng 06 : U Kyrtong ka NPP ban iakhun ia ka Shillong Lok Sabha Byelection Dr DRL Nonglait, ha ka sngi Palei ula ong ba ki Sorkar bala leit noh kim shym la lah ban pynurlong ia ka jingangnud jong ki samla ka Jylla, hynrei kane ka Sorkar ba mynta kala leh ia ki kam kaba kiwei kim shym la lah satia ban leh.
Haba kren ha ka rynsan ialap elekshon ha Nangbah, West Jaintia Hills, u Dr Nonglait ula ong ba ula kren ia kane ym kum u briew ka party ba iaroh iala ka party, hynrei kum u Ophisar bad u nonghikai uba la sakhi ia ki jingkylla.
“Nga la ioh ban sakhi bad iashimbynta ha ka por ba Ngam pat dei u dkhot jong ka NPP” ong u Dr Nonglait bad bynrap “Ngam shym iaroh iala ka jong ka party hynrei kum u Ophisar bad u Nonghikai uba la peit bad iohi bad kaei kaba shongdor”.
Haba pynkynmaw ia ki sngi jong u ha college, u Dr Nonglait ula iathuh ba ka jingdawa ia ka medical college bad ka state university ka dei kaba la kot da ki phew snem.
“Naduh ki por jong nga, ha ka por ba nga dang don ha college, ngi la dawa ia ka medical college” ulaong. “Ki Student Union, ki sengbhalang, ngi la dawa ba dei ban don ka Medical College, ka dei ban don ka State University, namar ka don tang ka NEHU, hynrei kawei ka Sorkar hadien kawei kim shym la lah ban leh ia kata, kimshym la lah ban pynurlong ia ka jingangnud jong ki samla”.
“Wat ka pule puthi ha ka kyrdan jong ki skul, ki jingeh ki mih kawei hadien kawei” ula ong. “Nga dei u sakhi bad uba la iohi dala ki jong ki khmat bad mano bala kren”.
U Dr Nonglait ula kdew ia ka jingplie jong ka National Law University ha u 2023-24 bad ka jingplie ia ki artylli ki nursing college kum ka sakhi ia ka jingtreikam.
“Ha u snem 2023-24, la plie ia ka National Law University bad Nga sngewnguh shibun ba ha ka por ba dang pynkhreh ia ki Nursing College ha ki khyndiat snem bala leit, ka NEHU, na ka Tnad kaba ma Nga hi nga khmih, Nga la lah ban ai ia ka jingbt” ula ong.
“Nga dei tang u Ophisar uba ai ia ka hukum, kumta kito ki artylli ki Nursing College kila lah ban plie, kawei ha Civil Hospital bad kawei ka Ganesh Das” ula ong.
Ula ai ka jingiaroh ia u Myntri ka Koit ka Khiah Bah Wailadmiki Shylla uba la pyniaid sted ia ki kam ki jam.
Halor ka Technical bad Professional Education, u Dr Nonglait ula ong ba kane ka Sorkar ba mynta kala wanrah ia ki jingpynkylla kiba khraw bha.
“Haba phai sha ka Technical bad Profession Education, kane ka Sorkar kala wanrah bun bah ki jingkylla, ka jingpynkylla ia ka puleputhi kaba ngi la sakhi ba ha ki snem ban wan, ki samla jong kane ka Jylla kin ioh jingmyntoi bha” ula ong.
Ula kren ruh halor ka jingshimkhia jong ka Sorkar ia ki jingdawa jong ki nonghikai.
“Haba phai sha ki skul, ki nonghikai kila wan sha madan Malki ban dawa” ong u Dr Nonglait bad bynrap “Mynta kane ka Sorkar kala ai ia ka tulop ba thymmai, ka jingpynkiew tulop manla u snem, ka don ruh ka jingpynlang ia ka pisa na ka bynta ki nonghikai kiba don ha ka jingshakri bad haba ki shongthait.
“Nga ong ba kane ka dei ka Sorkar kaba trei” ula ong bad bynrap “Kane ka dei ka Sorkar kaba sngap”.
