Shillong, Nov 5: Ka K.J.P. Girls Guide Company jongka K.J.P. Girls’ Higher Secondary School, Jaiaw, Shillong, kala ioh jingithuh kum ka Historical Unit/Group jongka Bharat Scouts and Guides halor ka jingiai bteng ka jongka ban noh synniang ha ka “Guiding Movement”.
Ia kane ka jingioh la pynbna da ka Meghalaya Bharat Scouts & Guides hadien ka jingioh khusnam ha National Headquarters, New Delhi ha ka 4 tarik u Naiwieng 2026, ha ka jingrakhe kane ka seng ia ka Diamond Jubilee.
Kane ka jingai khusnam kadei ia ki Scouts bad Guides Unit kiba la seng ha u snem 1950 ne shwa kane bad kiba la bteng beit ban iai iashimbynta ha kane ka Movement.
Kane ka jingioh jingithuh ia ka Unit na Shillong kaba la don ia ka jingiadei kaba la slem bah bad ka seng, ka jingiai bteng ban noh synniang ha ka “Guiding” bad ka jingkular ban saindur ia ki pateng jong ki khynnah kynthei lyngba kane ka Movement.
Lah palat da ki phew snem ka K.J.P. Girls Guides Unit kadei kaba la btin da ki nongialam ha ka pule puthi kynthup ia kiba ioh ia ka khusnam Silver Elephant Award i (L) Padma Shri Kong Silverine Swer, (L) Kong S. Briliancy Lyngdoh bad i (L) Kong Evelyne Nora Shullai, ba long ruh ka State Secretary barim jongka Meghalaya Bharat Scouts & Guides.
Katkum ka jingpynpaw jong ka State Secretary M. Lyngdoh, ka jingialam ka jongki bad ka jing noh synniang kala iarap ban saindur ia kiba bun kiba la ioh khusnam na ka jylla bad long ruh ka jingsahnam junom kaba iai bteng ban ai mynsiem ia ki pateng ban dang wan jong ki Girl Guides.
Ka jingai jingithuh ka long u mawjam uba kongsan ia ka jaka pule bad pyni ruh ia ka kamram kaba la iai bteng naduh mynshwa ha kaban tei ia ka jinglong nongialam, jingdon akor, burom bad ka jingshakri ia ki kynthei bad longkmie ka Meghalaya.
