Shillong, Risaw 17 : Ka Meghalaya Private Universities Regulatory Board (MPURB) kala sei man ba ha ka kyrteng ka jingiatreilang (collaboration), ka Martin Luther Christian University kala ai ia ka degree jong ka Master of Public Health (MPH) sha ki samla pule jong ka Indian Institute of Public Health, Shillong (IIPH-S).
Ia kane la pynpaw ha ka kaiphod ba la aiti da u Chairman ka MPURB LR Sangma sha ka Sorkar Jylla ha ka 20 tarik u Nailur.
Ka MPURB kala shong bishar ia ka “Jingiapynbeit ba shipor” (Interim arrangement) hapdeng ka IIPH-S bad ka MLCU hadien ka jingkynnoh ba pyniaid beain ka IIPH-S ia ka post graduate programme ha ka MPH (kaba la pynmih nyngkong eh ha Ka Shlem).
Ka MPURB ka ong ba kat kum ka kyndon 4 (3) jong ka Meghalaya Private Universities (Regulation of Establishment and Maintenance of Standards) Act, 2019:Baroh ki University Shimet kiba hap hapoh ka Ain ka Jylla ki dei ki Unitary Univesity kiba don biang ia ki jingdonkam haba ai jinghikai, wad bniah, eksamination hynrei kim don bor ban pynisoh bad kiwi pat hadien ka 15 tarik Risaw 2019 hadien bala pynmih ia ka jingpynbna ia ka Amendment Act.
Kat kum ka MLCU (Amendment) Act, 2019, ka MLCU kam long ban pyniadoh ia kiwei pat ki College bad ki jaka pule laitnoh tang ki college ba la pynkha hi da ka University ne MLCU hi.
“Ha ka kyrteng ka jingiatreilang, ka MLCU kala ai ia ki degree sha ki samla pule ka IIPH-S khnang ban lah iaid lait ia ki kyndon pyniasoh ba la pruid dak ha ka MCLU Act” ong ka MPURB ha ka kaiphod.
Kat kum ki kot ki sla bala ioh naka MLCU, tang artylli ki jingthungkam kum ki Adjuct Professor la leh ha ka 26 tarik Risaw bad 31 tarik Risaw 2017 hynrei ia ki hynriew ngut kiwei pat la pynmih ha ka 1 tarik Naitung, 2022.
“Lada ka long kumne, balei ba tang arngut ki briew la mynjur kum ki Adjuct Professor lane nonghikai naba ia ka course bala pyniaid da ka IIPH-S kala sdang naduh u snem 2019” kala ong.
Ka MPURB kala ong ba MoU bala iasoi hapdeng ka MLCU bad ka IIPH-S la paw ba kam dei satia kaba treikam (invalid).
“Ki nongsoi ia ka MoU ki khlem pyniaw ia ka sngi ba iasoi ia ka soskular, ia kaba ka copy jong ka, la suh lang, kaba paw shai ba kam lah satia ban treikam (invalid)”kala ong.
La ka MLCU kala shim ne em ia ka jingai jingbit ka Sorkar Jylla lyngba ka Tnad Education shuwa ban pyniaid ia ka Programme (MPH) jong ka IIPHS ha ka University jong ka, ka kaiphod ka pynpaw ba kat kum ka sokular hapdeng ka PHFI bad ka Sorkar Jylla lyngba ka Tnad ka Koit ka Khiah, kam shym la don satia ka kyndon ba kan pyniadon bynta ia ka MLCU ba kan ai degree sha ki samla pule ka IIPH-S.
Nalor kane, ka MPURB kala thoh ruh sha ka MLCU ha ka 1 tarik Nailur 2022, ban ai jingtip ia ka jingdon ki nonghikai ka MLCU bad IIPH-S nalor ki nongtrei ka IIPH-S hynrei kane ka university shimet ka khlem ai jubab satia kat haduh mynta mynne, ong ka kaiphod.
Ha ka 4 tarik Nailur, u Myntri ka Tnad Pule Puthi ma Lahkmen Rymbui ula kyntait ban pynkylla ia ka hukum jong ka Tnad Pule Puthi ba bthah ia ka IIPH-S ban pynsangeh shisyndon ban pynrung klas thymmai ia ki samla ban pule ia ka MPH ha ryngkat ka jingiatreilang bad ka MLCU.
Kane kala mih hadien ba ka Director ka IIPH-S ka Prof Sandra Albert kala thoh ia ka shithi ha ka 3 tarik Nailar sha u Deputy Secretary ba khmih ia ka Tnad Education Bah D Lyngdoh, ba dawa ban pynkylla ia ka hukum pynsangeh ia ka jingpynrung klas thymmai ia ki samla pule ba kwah pule ia ka MPHS ha ka IIPH-S.
Shuwa kane ka Tnad Education kala hukum ia ka IIPH-S ban pynsangeh ia ka jingpynrung klas thymmai haba kyrpad ruh ia ka Tnad Directorate of Information & Public Relations (DIPR) ban pynmih ia ka jingpynbna paidbah ha ki lad pathai khubor ba ki University shimet kat kum ki ain jongka Meghalaya, kim don bor satia ban pyniasoh ia kino kino ki College/ Approved College ne Autonomous College.
