Shillong, Naiwieng 04: U Myntri Rangbah ka Jylla Conrad K Sangma ha ka sngi Balang u la plie ïa ki ar tylli ki jaka ieng kali kiba heh – ka District School Education Office-cum-Multilevel Car Park ha Mawkhar bad ka Fully Mechanised Car Park ha Motphran kaba thmu ban pynduna ïa ka jingdheng kali ha nongbah Shillong.
Ha kane ka sngi la don lang u Symbud Myntri Rangbah ba khmih ia ki kam pynroi sor Bah Sniawbhalang Dhar.
La shna ia kine ki jaka pynieng kali lyngba ka ka Shillong Smart City Mission ha ka jinglut kaba T.38.92 klur. Kine ki ar tylli ki jaka ieng kali kin pynbiang jaka ieng na ka bynta 200 tylli ki kali ha ki ar tylli ki jaka ba khapngiah tam ha nongbah Shillong.
Haba kren ha kane ka sngi, u Conrad u la ong ba ka jingdheng kali ka dang dei ka mat kaba ktah bha iaka nongbah Shillong ia kaba la pynpaw da ki nongshong shnong bad ki nongjngohkai pyrthei ruh kumjuh.
“Ka jingdheng kali ka dei ka mat kaba ktah bha iaka nongbah Shillong, kaba la pynpaw ym tang da ki nongshong shnong hynrei da ki nongjngohkai pyrthei ruh. Ki sorkar bad ki tnat kiba bun ki la pyrshang ban wad ïa ka lad ban weng ïa ka, hynrei ngi la sngewthuh ba ki sienjam kum ka jingshna ïa ki surok one way ne ki jaka ieng kali kam lah ban long ka lad ban weng shi junom iaka jingdheng kali” u la ong.
U Conrad ula ong ba ka sorkar ka la leh ia ka jingwad bniah ia ka leit ka wan ki kali kaba neh haduh palat 18 bnai da kaba pyndonkam da ki drone, ki dur satellite bad ka jingkhein ia ki kali ban sngewthuh ia ka daw tynrai jong ka jingdheng kali.
“Kawei na ki jinglap ba kongsan ka long ba katba ngi dang ithuh iaki jaka bym shah ieng kali ne No Parking Zone, ngim thaw pat ia ki jaka ieng kali. Lada phi kwah ban khanglad ia u briew ban ieng kali shawei pat, phi hap ban ailad ia uta u briew ban ieng kali shawei pat,” u la ong.
U Myntri Rangbah u la ong ba ka jingpynieng kali hajan ka Additional Secretariat ka dei ka sien kaba nyngkong eh kaba kum kane bad kine ha Mawkhar bad ka Motphran ki dei ka bynta kaba ar.
U la ong ba u myntri ka tnat Road Transport ka Sorkar Pdenge u Nitin Gadkari u la ai ka jingiaroh Shillong Model.
“U la sngew lyngngoh bad sngew tynnad ban iohi iaki jaka ieng kali ha Shillong. U la kylli ia nga mano ba shna ia kane bad u la ong ia ki ophisar jong u, to buh jingthoh, kane ka dei kaei kaei kaba dei ban pyni nuksa ha kylleng ki jaka lum jong ka ri” ula ong.
U la ong ba hapoh ka State Parking Policy, ka sorkar kan ai haduh T.1 lak sha ki riew shimet ne ka imlang sahlang kiba don jaka ban pynlong jaka ieng kali.
“Ka jinglong trai bad ka jingpyniaid kan sah bad ka imlang sahlang. Ka dei ka jingiatreilang kaba pynshong nongrim ha ka imlang sahlang kaba ai jingshakri bad ai kam ruh ia ki samla jong ngi,” u la ong.
U la ong ba ka Administrative City kaba thymmai bad ka jingpynkynriah ia ka Secretariat hapoh u bnai Nalur-Naiwieng jong u snem ban wan kan nang pynduna shuh shuh ia ka jingkhapngiah ha ka nongbah. U la pynksan ia ka jingsumar kaba biang, da kaba ong, “Ka jingtei ia kaei kaei ka long kawei ka bynta. Ka jingpyniaid bad jingsumar ia ka ka long ka bynta kaba pher.”
