Imphal, Naiwieng 4: Kumba saw ngut ki dkhot, ki la iap ha ka jingiasiat suloi, kaba la neh slem bha, ha kaba ki kynhun jong ka Zeliangrong United Front (ZUF) bad ka NSCN-IM, ha ka Manipur, Noney district, ha ka step jong ka sngi Balang.
Kane ka jingiasiat ka la jia ha ka por kumba 3.30 baje mynstep ha ka shnong Taodaijang kaba la tip ruh kum ka Buanruang kaba hap hapoh ka jingpeit jong ka Nungba Police Station.
Katkum ki tyllong khubor ba la ïoh lum na ka thaiñ, la ïathuh ba katei ka jingïakhun ka dei kaba la ïakhun da ki dkhot jong ka Zeliangrong United Front’s Jenchui faction (ZUF-J), Kamson faction (ZUF-K) bad ka NSCN-IM.
Ki kaiphod na ki jaka ki pyni ba saw ngut ki dkhot ki la shah pyniap, kynthup ia lai ngut na ka ZUF-J bad uwei na ka ZUF-K.La iathuh ruh ba ki dkhot jong ki kynhun ki la don kiba mynsaw, wat la ym pat lah ban tip ia ka jingkhein kaba thikna.
La iathuh ba ka jingiasiat suloi kaba jur ka la bteng palat ia ka jingialeh kaba nyngkong, kaba la pynmih ia ka jingsngewkhia jong ki nongshong shnong halor ka jinglah ban nang jur jong ka jingiakynad ha katei ka thain.
La iathuh ba ka Rongmei Naga Luphuam (ka thain Nungba) ka la kyrpad ia ki kynhun kieng atiar ba kin sangeh noh mardor ia ka jingialeh pyrshah, ban teh lakam bad ban ai lad ia ka jingsuk.
La iathuh ba ki pulit bad ki bor pahara ki la iakynduh jingeh ban poi sha katei ka jaka namar ka jaka kaba jngai bad kaba riat bha.Ka jinglong jingman kam pat da shai tikna haduh ba thoh ia kane ka kaiphod.
Ki jingjia kiba thikna kiba la pynlong ia katei ka jingiasiat, ryngkat bad ka jingithuh ia kiba la iap bad ka jingdon jong kiba mynsaw, ym pat lah ban pynthikna bha.Dang ap shuh shuh ia ki jingtip ba bniah.
