Shillong, Naiwieng 03 : Haba u kyrtong ka Voice of the People Party (VPP) ban iakhun ia ka elekshon shiteng samoi ka Shillong Lok Sabha, Prof Batskhem Myrboh, ula pynbna ba ka long kaba “Bakla” ia ka Jylla ban kyrshan ia ki Gospel Concert, um shym la buh dak jingkylli tang ia kawei ka prokram hynrei ula plie ia ka rynsan iatai kaba ktah bha halor ka jingmut jong ka synshar khadar kaba khlem pyniakhleh bad ka niam (secularism) ha Meghalaya.
Ha ka jingthoh ha Facebook ha ka sngi Ba-ar, u Prof Myrboh ula ong “Ka long kaba bakla ia ka Jylla ban pynlong ia ki jing ialam niam tang na ka bynta kawei ka kynhun. Lada ka pynlong ïa kawei, ka hap ban leh kumjuh ruh na ka bynta baroh kiwei pat ki kynhun.”
Ula bynrap “ Ka India, kynthup ka Meghalaya, ka dei ban long secular,” bad u la pynkut da kaba ong, “Ka niam ka dei kaba bha tam ban ieh ha ka kti jong ki kynhun shimet.”
Ha ka dur kaba paw shabar, kane ka jingkren ka paw kum ka jingmut kaba don nongrim.
Hynrei, ha ka Jylla kaba don palat 70 percent ki Khristan, ha kaba ka jingrwai Gospel ka long ym tang ka bynta jong ka jingngeit hynrei ruh jong ka kolshor, bad ha kaba ka Sorkar ka ju kyrshan ïa ki tamasa, ki prokram halor ki kolshor bad ki jingïalang jong ki kynhun bapher-bapher, ka mih ka jingkylli: Hato kane ka dei ka secularism, ne ka secularism ba da jied?
“Ka secularism ha India kam ju mut ba ka Sorkar ka dei ban jngai na baroh ki niam. Ka mut ba dei ban burom kumjuh ïa baroh ki niam, ym ban pyrshah ïa kano-kano. Lada ka Sorkar ka lah ban kyrshan ïa ki tamasa kam jngohkai pyrthei, ki prokram pyni kolshor bad ki jingïalehkmen jong ki kynhun bapher-bapher kiba don ruh ki dak jong leh niam, balei ban ñiew tang ïa ka Gospel concert marwei kum ka jingpynkheiñ ïa kane ka nongrim?” ong uwei u nongshong shnong uba pynpaw ïa ka jingsngewkhia.
U la ong ba ka VPP ka la tei ïa ka saiñ pyrthei jong ka halor ka jingïada ïa ka jinglong kyrpang (identity), ka kolshor bad ka jingngeit. Kan long kaba eh ïa ki nongkyrshan jong ka ban batai balei ka Gospel concert, kaba ia ki hajar ngut ki briew ha Meghalaya ka dei ka jingpynpaw ia kata ka jinglong kyrpang, ka dei ban shah kyntait na ka jingkyrshan paidbah.
“Ka jingkylli ka mih ruh halor ka jinglong thikna jong ka nongrim. Lada ka jingmut ka long ba ka Sorkar ka dei ban pynlong ïa ka prokram ia baroh ki kynhun lada ka pynlong ïa ka prokram na ka bynta kawei ka kynhun, hato ka VPP ka thmu ban pyntreikam ïa kane kajuh ka jingthew ïa baroh ki tamasa, ki jingrakhe bad ki prokram halor ka kolshor kiba kyrshan da ka Sorkar? Lane, hato kane ka jingthew ka treikam tang haba ka prokram ka don jingiadei bad ki Khristan?”
Ka jingthoh jong u Prof Myrboh ka kyllum lang bad kawei ka jingïapher kaba kongsan: hapdeng ka jingpynlong ka Sorkar ia ki jinglehniam lehrukom bad ka jingkyrshan ka Sorkar ïa ka prokram u paidbah ba iadei bad ka kolshor kiba don jingiadei bad ka niam. Ka Gospel Concert kam dei ka jingshakri niam ha ka ïingmane kaba la pynbor ïa ki nongshong shnong. Ym don mano-mano ba shah pynbor ban leit. Ka jingkyrshan ïa ka kam kum kane kam pynlong ïa ka Meghalaya kaba duna ha ka jinglong secular, kumjuh ruh kumba ka ju ai jingkyrshan ïa kiwei pat ki tamasa jong ki kynhun bapher-bapher kam pynlong ïa ka Jylla kaba shah synshar da ka niam.
