Shillong, Naiwieng 03: Ka United Democratic Party (UDP) ha ka sngi Nyngkong ka la pynkut noh ïa ka jingïadei kaba la jan dap lai snem bad ka sorkar MDA-II ba la ïalam da u Conrad K Sangma, da kaba rai ban weng noh ïa ka jingkyrshan.
Ia kane ka rai la shim haka jingialang jong ka UDP Central Executive Committee (CEC) hadien ka jingiehnoh kam u president ka party u bah Metbah Lyngdoh kum u Myntri Sorkar haka 1 tarik Naiwieng.
U General Secretary ka UDP bah Titosstarwell Chyne u la ong ba u bah Metbah u la pyntip sha ka CEC halor ka jingiehnoh kam jong u kum u Myntri Sorkar.
“U President u la pyntip sha ka CEC ba u la iehnoh ia ka kam Myntri Sorkar bad u la aiti ia ka shithi iehnoh kam jong u sha u Myntri Rangbah ka jylla ha ka sngi saitjain,” ong u bah Titos.
“Shisien ba u President bad MLA ba marwei kum u myntri, u la iehnoh kam, ka CEC ka sngew ba kan bha ba ngin weng noh ia lade na ka sorkar,” u la ong.
U bah Titos u la ong ba ka CEC ka la kyntu ruh ia u bah Metbah ba un weng noh ia ka jingkyrshan jong ka party ia ka sorkar, kaba ka UDP ka la kyrshan iaka MDA naduh u snem 2023 hadien ka jingkhot u Myntri Rangbah ka jylla.
U la kyntait ia kano kano ka jingpynbor kaba don ha lyndet jong ka jingieh noh kam u Bah Metbah.
“Kam shym la don kano kano ka jingpynbor. U president, da ka mon jong u hi bad hadien ba u la iamir jingmut bad ki nongialam ka party, u la shim ia ka rai ban ieh kam noh kum u Myntri Sorkar ha ka sngi Saitjain ba la dep,” u la ong.
U bah Titos u la ong ba ka UDP kaba don mynshwa 12 ngut ki MLA ha ka Sorkar synroplang, mynta ka la don tang uwei, bad kam iohi ia ka nongrim ban bteng ban don bynta ha ka sorkar.
“Ka NPP marwei ka don 36 ngut ki MLA, bad da ka jingkyrshan jong ki 11 ngut ki MLA bad ka HSPDP, ki don ka jingdon u Number uba biang bha ban bteng ban ialam ia ka sorkar,” u la ong.
Mynta ka party kan pynleit jingmut ban nang pynkhlain iaka Party khamtam ha ki constituency ba kam don MLA ne MDC.
“Kane kan ai por ia u president jong ngi, uba dei u MLA marwei, ban pynbeit thymmai bad pynkhlain ia ka Party” ula ong.
U la bynrap ruh ba kum ka party ka bym don shuh haka Sorkar, ka UDP kan long laitluid ban rah ïa ki mat jingeh jong ki paidbah khlem ka jingshah teh shah khum ba don ha ka sorkar, hynrei kan leh halor ki nongrim ym tang ban kdew kti ïa ka sorkar.
