Shillong Risaw 16: Ka Blind Lead Trust (BLT) ha ka sngi saitjain kala pynlong iaka jingrakhe iaka World White Cane Safety Day da kaba pynlong iaka jingiaid paidbah ha kylleng ka nongbah Jowai kum shi bynta ban pynsngewthuh ia ki paidbah ha kaba iadei bad u diengduh lieh bad ban burom lem ia ki briew kibaduna haka bor ïohi.
Kantei ka jingiaid paidbah kala sdang na Stand War bad la pynkut pat ha Indoor Sports Hall, Ladthalaboh Jowai ha kaba ki nongiashimbynta kila rah ia ki jingthoh bad ki banner bad kila sam ruh ia ki kot lyngkdop sha ki paidbah ban pynsngewthuh shaphang ka World White Cane Safety Day ne ka sngi ka jingïada ïa kiba bat ïa u diengduhlieh.
La wan ïarap bad synran ruh da ki samla pule bad ki NCC jongka Thomas Jones College bad ki samla pule jong ka Kiang Nangbah College.
Ka ADC jongka West Jañtia Hills District ka Kong D.T. Syngai haba kren kum ka Kongsan kala ong, ba na ka liang jong ka sorkar ka leh shibun ki kam ban pynsuk ïa kiba don ka jingduna ha ki dkhot met, hynrei ki dang don shibun kiba dang dei ban leh shuh shuh.
Kala ong, lyngba ka SSA la wanrah shibun ki jingïarap ïa ki khynnah kiba don ka jingduna ha ki dkhot met bad wat iaki elekshon ruh nangne shakhmat kin pynsuk ïa kiba don ka jingduna ha ki dkhot met.
Kala pynpaw ruh iaka jingsngewkmen ba ka kynhun tem jong kiba don ka jingduna haka bor iohi kaba ïalam da u ma Micky Pajuh kaba la ai kyrteng “Life After Dark” kala shah jied haka Election Commission ban mihkhmat ïa ka jylla sha Delhi.
U Riewpawkhmat na rilum Jaintia u Dr H.H. Mohrmen haba kren ha ka jingialang ula ong ka sorkar jylla kaba mynta bad ki sorkar kiba mynshuwa kila leh klet bad leh bymsuid niew ïa ki nongshong shnong kiba don ka jingduna ha ki dkhot met bad ka sorkar kam shym la kynthuplang ia kiba duna ha ki dkhot met ban ioh jingmyntoi lyngba ka skhim ne ki project bapher da kaba ai nuksa iaka skhim FOCUS ne Skill Development jong ka sorkar jylla.
Ula ïathuh ba naka liang jong ka kynhun SURE kala phah ïa ka jingtyrwa shakasorkar jyklla ban sdang ïaka training ne jingai jinghikai ha Moosakhia ha kaba u Bah Kelvin Suting uba long u Master Craftsman (Handicraft) u bym lah ban ïohi, yn ai jinghikai ïa kiwei pat ki bym lah ban ïohi, hynrei haduh mynta ka sorkar kam pat pdiang satia ïa kane ka jingtyrwa.
U Bah Mohrmen u la ong, ba u kwah ban ïohi ba kiba duna ki dkhot met kin long laitluid bad ba kin ym donkam ban ap shaniah shuh ha kiwei kumba long ha kiwei pat ki ri kiba la shai.
U Director jongka Blind Lead Trust Bah Jitendra Dkhar ula ong, katkum ka khanasamari jong u snem 2011 ka jingdon jong kiba duna ka jingïohi ki don haduh 13, 532 ngut hapoh ka jylla bad ki don ki khep ba kiba don ka jingduna haka bor ïohi, ki shah knieh ki Mobile Phone, ki shah kloh pla ha ki riewsniew haki ïew ki hat.
Ula ong, donkam ban don ka añ ban ïada ïa ki briew kiba pyndonkam ïa u diengduhlieh namar ba teng teng ki nongñiah thuk thuk kim patiaw bad ki leh bym suidñew wat haba ki ïohi ïa ki briew kiba pyndonkam ïa u diengduhlieh haba ki ïaid ha ki surok.
Katba u Bah Rimiki Pajuh u bym lah ban iohi, ula ong, ba ki briew ki bym lah ban iohi kila mad iaki jingeh namar ba ki paidbah kim pat tip shaphang u diengduh lieh bad wat ki nongñah taksi ne ki pulit pynïaid kali (traffic police) ruh kim pat bna eiei ruh em shaphang u diengduh lieh la kynnoh ki briew kiba don ka jingduna haka bor jingïohi.
U la ong, ki briew kiba don ka jingduna ha bor ïohi, kila duh noh iala ka hok katkum ka riti synshar namar ka sorkar kam lah ban pynbiang ïa ki jingdonkam jongki kum ki lynti ki syngkien bad wat ha ki ophis sorkar ruh ym shim la don ki jaka iaid kiba biang naka bynta kiba duna haka bor iohi bad wat ki briew ruh kim don satia iaka mynsiem ban ïarap lem ia ki.
Ha katei ka jingialang la ioh ruh iaka jingkren na ka Repanlin Lyngdoh kaba pule MSW haka St Edmunds College, Shillong, ka Secretary jongka seng Parent of Children with Disability ka Kong Belbora Wankhar bad kiwei kiwei.
