Shillong, Risaw 31 : U Myntri ka Tnad Bording ka Jyla bad President ka United Democratic Party (UDP) Bah Metbah Lyngdoh, ha ka sngi Saitjain ula hiar shuki na ka kynhun Myntri ka Sorkar MDA, hadien ka jingphet seng ki 11 na ki 12 ngut ki MLA ka party.
U Bah Metbah ula pynthikna ba ula aiti ia ka shithi iehnohkam sha u Myntri Rangbah Conrad K Sangma, haba pynpaw ba ia kane ka rai la shim hadien ka jingbishar bniah ia ka jinglong jingman ka sain pyrthei bad ki jingjia ba dang shen hapoh ka party.
Da ka jingphet ki 11 ngut ki MLA na ka UDP, u Bah Metbah ula sah marwei kum u nongmihkhmat ka UDP sha ka Iingdorbar Thaw Ain ka Jylla.
Ula pynpaw ba ka Central Executive Committee ka party kan sa iatai halor ki jingjia sain pyrthei bad kan sa shim iaki sienjam ban sa shim hadien ha ka jingiasyllok lang bad ki nongialam lem bad ki nongkitkam.
Ha kajuh ka por, haba kyntait ïa ki khubor hamsaia ba u la shah pynbor ban iehnoh kam, u Bah Metbah u la pynskhem ba kane ka rai ka dei kaba la shim da lade hi, bad la shim hadien ka jingpyrkhat bniah.
