Ai jingkular u Myntri hakhmat ki nongialam ka KSU
Shillong, Risaw 31 : Hadien 17 bnai ba pynsangeh ia ka jingthungkam bad ka jingnang bun ki jingujor na NEIGRIHMS, ka Sorkar Pdeng khatduh kala pynsangeh shuwa ia ka jingthungkam ha kane ka Institute.
U Myntri ka Koit ka Khiah ka Sorkar Pdeng JP Nadda ha ka sngi Saitjain ula ai ka jingkular hakhmat ki Nongialam ka Khasi Students’ Union (KSU) ba kan ym pat don shuh ka jingthungkam thymmai ha NEIGRIHMS katba ym pat lah pynbeit ia ka policy bad pyntip ba ka Ministry kan sat hung ia ka Committee ka ban shong bishar ia ka jingsam bhah bad kiwei ki kam ain, kynthup ka jingithuh kum ka Institute of National Importance.
Kane ka jingkular kala mih hadien ba ki nongialam ka KSU ba ialam da u President samla Raymond Kharjana bad u General Secretary samla Reuben Najiar, kila iakynduh ia u Nadda ha Delhi bad aiti ia ka dorkhas kaba batai bniah ia kaba ka seng ka ong ba dei ka jingpyntroin ia ka jingdon ki nongtrei trai ri bad ka jingshngain ki nongpang ha ka Institute. U Myntri Rangbah ka Jylla Conrad K Sangma ula iadonlang ha kane ka jingialang.
“U Myntri ka Koit ka Khiah ka Sorkar Pdeng ula kular ia ngi ba un sa thung ia ka Committee ban khmih ia ki kam ba iadei bad ka policy namar ki don katto katne ki bynta jong ka ain bad kumjuh ba ki kwah ban peit bniah haba iadei bad ka jingsam bhah bad kiwei kiwei ki bynta. Ula kular ruh ba un sa pyrshang ban pynbeit noh ia kane ka kam hapoh ka shibnai” ong u samla Najiar.
U la bynrap, “Kumba u la kular ïa ngi ba un peit bniah ïa kane ka kam, un thaw ïa ka committee kaba kan bishar ïa ka jingsam bhah ha NEIGRIHMS, ka jingithuh kum ka Institute of National Importance (INI) bad kiwei pat ki mat kiba ïadei bad ka aiñ. Haba ïadei bad ka jingthung kam, u la ong ba yn ym don kano-kano ka jingthung kam thymmai tad haduh ba la pynbeit ïa baroh kine ki mat.”
“Ngi la pyntip ha u ba la don 17 bnai ba kane ka kam ka dang sahkut bad ka jingthung kam kam shym la ïaid shakhmat, kaba la ktah ïa ka tnad ka koit ka khiah. U la kular ba un pynsted ïa kane ka kam. U la dep ruh ban pynlong ïa ka jingïalang jong ka Governing Council ha ka taïew ba la dep bad ki bor pynïaid jong ka NEIGRIHMS, bad ngi kyrmen ba baroh ki mat kin sa lah ban pynbeit hapoh shi bnai,” ong u samla Najiar, haba bynrap ba ka seng ka ai khublei ïa u Myntri halor kane ka jingkular.
Ha pdeng jong ki jingud jong ka KSU ka don ka kam thung ïa ki Nursing Officer. Ha ka dorkhas, ka seng ka la ong ba ka rai jong ka NEIGRIHMS ban thung ïa ki Nursing Officer lyngba ka NORCET ha u snem 2023, khlem da bud ïa ka jingsam bhah ba 80:20 hapdeng ki kynthei bad shynrang kaba la pyntreikam ha AIIMS bad kiwei ki jaka ai jingsumar jong ka Sorkar Pdeng, ka la long ka jingbakla kaba dang bteng ban ktah ïa ka jingsumar ïa ki nongpang.
Na ki 194 ngut kiba la shah jied, 175 ngut ki dei ki nurse shynrang bad tang 19 ngut ki dei ki nurse kynthei ia kaba ka KSU ka ong ba bun na kine ki nurse kynthei bad shynrang ki dei kiba shah kyntait na kiwei ki jaka ai jingsumar hadien ba kim shym la shah jied ha kiwei pat ki jaka, bad mynta ki la shah thung ha ki tnad kiba donkam kyrpang, kum ka obstetrics, gynaecology, maternity bad paediatrics, ha kaba ka jingdon ki nongtrei kynthei ka long kaba kongsan na ka bynta ka burom, ka jingsuk bad ka jingshngaiñ jong ki kynthei bad ki khynnah.
Ka KSU ka la kynnoh ba kane ka jingbym ïaryngkat ka la wanrah ïa ki jingeh kiba khraw. Ka seng ka la kdew ïa ar tylli ki jingjia jrong kti kynshlein, kynthup ïa kawei kaba ïadei bad kawei ka khynnah kynthei kaba hapoh 18 snem, ha kaba la register ïa ka mukotduma hapoh ka POCSO Act. Katkum ka jingong jong ka KSU, ïa ki Nursing Officer shynrang kiba shah kynnoh la dep charge-sheet hynrei ym shym la suspend ïa ki bad ki dang bteng ban trei haduh mynta. Ha kawei na kine ki jingjia, uwei u nurse shynrang ula leit ïakhih hakhmat ka ophis jong u Director ban kyrshan ïa u briew ba shah kynnoh, bad ka bor pynïaid jong ka NEIGRIHMS ka la shah ïa kane.
Ka seng ka la buh jingkylli ruh halor ki kyndon thung kam kiba thymmai, kiba dawa ïa ka jingshemphang da kaba trei arsnem na ki hospital kiba don 50 jingthiah (50-bedded hospital) haba iasaid ba ki nurse kiba la shakri da ki snem ha ki PHC bad CHC bapher-bapher ha Meghalaya kin shah khein duh ïa ka lad ban aplai, namar kiba bun na kine ki jaka ai jingsumar kim don 50 tylli ki jingthiah.
Ka jingpynhiar kynsan ïa ka rta kaba heh tam ban aplai, na ka 35 snem sha ka 30 snem na ka bynta ki Nursing Officer bad 27 snem na ka bynta ki Pharmacist, ka jingpynlong ïa ki eksam lyngba ka computer (Computer-Based Test) da ka agency kaba na shabar, ka HLL, watla ha ka jylla ki dang duna ki jaka ialeh eksam da ki kor computer.
Halor ka bhah thungkam, ka KSU ka la ong ba ka NEIGRIHMS ka la pynbna ïa 27 percent ki kam na ka bynta ka OBC bad 15 percent na ka bynta ka SC ha ka jylla kaba ym don satia ïa ka OBC list bad kaba don tang kumba shi percent ki SC, kaba long ka jingplie lad ia ki briew nabar jylla ban ïoh jingmyntoi na kine ki bhah, kaba long pyrshah ïa ki rai jong ka Supreme Court kiba ong ba ki bar jylla kim lah ban kam kum ki SC, ST ne OBC ha kawei pat ka jylla.
