Shillong, Risaw 30 : Ka Commissioner & Secretary ka Tnad Tourism Kong RM Kurbah ha ka sngi Thohdieng kala ong ba ka jingujor ejahar ka long kaba donkam lada don ka jingkyntur pud shapoh ka nongkynti ka Sorkar bad maham bad ka Sorkar kan hap ban leh eiei lada ka KHADC kam lah ban weng ia ka tala bad ka muhor na ka Shillong Peak Ropeway Camp ha Madan Laban.
“Ka jingujor ejahar ka long kaba donkam lada don kano kano ka jingkyntur shapoh u pud ka nongkynti ka Sorkar, ngi hap ban leh eiei” ong ka kong Kurbah haba pynthikna ba ka Tnadkala ujor ia ka ejahar hadien ba ka Enforcement Wing ka KHADC kala khang tala ia ka jaka jong ka Lower Terminal ha ka 27 tarik Risaw.
“Ngi la thoh shithi sha u (Secretary ka EC KHADC) ryngkat ki mat ba hap ban leh na ka liang jong u, kata ban weng ia ka tala bad ka muhor na ka camp. Ka dei ka nongkynti ka Sorkar, kumta, ka jingkhang ia ka lower terminal point ka dei ka bym lah satia ban leh. Kam dei satia jong kano kano ka kynhun shimet, ka dei ka nongkynti ka Sorkar, kumta, ka jingkurup kam dei kaba donkam ban leh” kala ong.
“Ki lai tylli ki mat kiba ngi la kdew ki long ban weng mardor ia ka tala bad ka muhor, ban weng noh ia ka jingkurup kaba la leh ha ka 27 tarik Risaw bad pynthikna sha ngi da ka jingthoh, lem kumta lada ym leh eiei halor kane, ka Sorkar kam banse ban shim ia ki sienjam ban leh eiei na ka liang jong ngi” maham ka kong Kurbah.
Kala ong ba ka jingkurup ka dei kaba la leh khlem da iaid kat kum ki lynti kiba dei.
“Nga shu kwah iathuh ha phi halor kaei kaba jia mynta. Kumba phi tip, ha ka 27 tarik Risaw kala don ka jingleit khang ia ka jaka treikam jong ka Ropeway Project ha Madan Laban da u Inspector ka District Council. Kumba 10-13 tylli ki building ba kurup, ia ka Ophis ruh la kurup bad khang tala” kala ong.
Ka kong Kurbah kala ong “Shim kum ka nuksa, ki briew kiba shim ram na ki bank bad kim siew ia ka ram, ki ju ioh shuwa da ka notice. Kumnp ka lynti jong ka ain ka iaid?. Ki hap ban ai notice sha ki bym siew. Khlem kano kano ka notice ne kano kano kaba iaid kat kum ka ain, kila shu leit beit beit bad khang tala ia ka, nalor kata ka dei ka nongkynti ka Sorkar” ong ka kong Kurbah.
Ka Commissioner kala ong ba ki kam kiba la pyntrei mynta ha katei ka jaka ki long tang ki kam ban pynkhreh kiba la shah hapoh ka Meghalaya Ropeway Act, 2022 katbym pat ioh ia ka Trading Licence.
Halor ka kam Trading Licence, ka kong Kurbah kala ong “Haba ki briew kila wan iashimbynta ha ka jingkhot tender, ki lah ban don 3-4 ngut hynrei ha ka por ba ki aiti ia ka tender kim dei kiba dang ban aplai ia ka trading licence. Hadien ba ki ioh ia ka work order kin sa leit sha ka district council ban aplai ia ka trading licence. Kat bym pat ioh ia ka licence, ka ain ka shah ban trei ia ki kam na ka bynta ban pynkhreh ia ki tum ki tam kiba donkam, ban shna ia ka surok sha katei ka jaka bad kiwei kiwei ki kam…baroh ki dei kiba shah kat kum ka ain”.
“Ka jaka ka dei ka nongkynti ka Sorkar, kumta kam hap satia hapoh u pud u sam jong u Syiem ka Hima Mylliem. Kala dei lypa ka nongkynti ka Sorkar, hynrei uba hap ban shim ia ka NoC u dei tang u contractor. U hap ban shim ia ka NOC bad kat kum ka jingbthah naka district council, u hap ban ioh ia ka na ka Hima Mylliem. Kane kam dei ka kam jong ka Sorkar, ka dei ka kam jong u Contractor” kala pynshai.
Ka Kong Kurbah kala iathuh ba u contractor ula dep ban aplai. “U Contractor ula aplai ia ka trading licence. Ha u bnai Risaw 2025, ula ioh ia ka work order. Ha ka 4 tarik Jymmang ula ioh ia ka NOC na ka Dorbar Raid Laban, ha ka 18 tarik Jymmang ula leit sha District Council bad aiti ia ka Form 5, kaba dei ka form aplikeshon na ka bynta ka trading licence ha ryngkat kiwei ki kot ki sla. Ka kam ka dang iaid, ki dang pan shuh shuh ia ki kot ki sla” ong ka kong Kurbah.
“Lada ki ong balei ba phi trei khlem da ioh ia ka licence, la kumno kumno ruh kala dei ban don da ka jingthoh lane ka kynja notice sha u bad sha ngi ruh kumjuh. La ai show cause notice sha u bad ula dep jubab ha u bnai Nailur” kala bynrap.
“Ka project ka hap ha ka jaka Raid ba 20% katba 80% ka hap ha ka jaka Sorkar bad kane ka jingwan khang ka KHADC ka dei kaba la leh ha ka jaka Sorkar. Namar kane ngi la ujor ia ka ejahar” ong ka kong Kurbah.
