Itanagar, Risaw 15 :U Chairman ka Arunachal Pradesh Public Service Commission (APPSC) u Nipo Nabam ula iehnoh ia kane ka kam kaba ula bat baroh shiktta hadien ki kynrum kynram kiba mih lyngba ka jinglaittuh ki jingkylli jong ka APPSC.
U Nabam ula aiti ia ka shithi iehnoh kam sha u Lat ka Arunachal Pradesh u Brigadier (retired) BD Mishra hynnin ka sngi Thohdieng.
Kane ka jingiehnoh kam jong u chairman ka APPSC kala wan long ruh hadien ka jingshah banbor na ki kynhun seng bapher bapher kiba la dawa ia ka jingiehnoh kam ka jong une u Chairman hadien ka jingjia jong ka jinglait tuh ki jingkylli.
U Nabam ula ong; “Namar ki kynrum kynram kiba don hapoh ka APPSC kiba la wan jia namar ka jingleh bakla ha ka liang ki katto katne ki ophisar ka Arunachal Public Service Commission halor ka jinglait tuh ki jingkylli na ka bynta ka jingpynlong ia ka eksam na ka bynta ka post Assistant Engineer (Civil), bad kum u khliehduh jong ka Commission Nga sngew ba Nga dei ban iehnoh ia kane ka kam halor ka nongrim jong ka jingsngew kitkhlieh.”
“Nga la phah ia ka shithi iehnoh kam namar ka jingsngew kitkhlieh halor ka jingleh bakla jong ki katto katne ki ophisar ka Commission, bad da kaba shim ia ka jingai jingmut jong ka kynhun seng ba hakhliehduh jong ki kynhun nongshong shnong ka jylla Nga la ai ia ka shithi ha u Lat ka jylla ba un pdiang ia kane ka jingiehnoh kam ka jong Nga kum u Chairman jong ka State Public Service Commission,” ong u Nabam.
Ha kawei pat ka bynta, na ka liang ka sorkar Arunachal kala pynkhreh ban wanrah ia ki artylli ki kyndon ain ba kyrpang ban tehlakam ha kaba iadei bad ka jinglait tuh ki jingkylli hapoh ka APPSC.
Na ka liang u Myntri Rangbah (CM) ka jylla u Pema Khandu ula shim ia kane ka jingjia jong ka jinglait tuh ki jingkylli na ka bynta ka eksam assistant engineer (civil) ba la pynlong da ka APPSC kum ka jingbuhkhoh kaba jur na ka bynta kito kiba angnud ban iakhun.
