Shen yn pynlong iaka Special Camp ia kiba nongthep vote ba khlem pat kynthup
Shillong, Risaw 26: Ka Jylla Meghalaya ka don 21,83,963 ngut ki nongthep vote hadien ka Special Intensive Revision (SIR) 2026, kaba hiar da 1,65,682 ngut ki nongthep vote na ka jingkheiñ shwa ka SIR kaba long 23,49,645 ngut, ong u Chief Electoral Officer u Dr BDR Tiwari.
U Tiwari u la ong ba ïa ka thup kyrteng kyrteng thep vote ba khatduh jong baroh 60 tylli ki constituency la pynmih ha ka 26 tarik u Risaw hadien ba la pyndep ïa ka jingpynrung kyrteng, ka jingpynmih ïa ka draft, ki jingbishar bniah iaki Notice, ki jingpynkylla kyrteng bad kiwei kiwei ki jingdonkam.
Ha shwa ka SIR, ka jylla ka don 11,58,740 ngut ki shynrang, 11,90,898 ngut ki kynthei bad 7 ngut ki Third Gender bad ka ratio ka long 1028 haka Gender Ratio bad 651 haka EP ratio.
Ha ka jingkheiñ briew naduh ka 30 tarik Jylliew haduh ka 29 tarik Naitung ki BLO ki la leit sha ki ïing briew bad ki la sam haduh 23,49,645 tylli ki phorm, hynrei tang 21,69,243 tylli la lum pat.
Kiwei pat ki 1,80,402 kim shym la lah ban lum bad la weng noh na ka draft roll ba la pynmih ha ka 5 tarik u Nailar kynthup ïa ki 81,490 ngut kiba la khlad noh, 45,011 ngut ki bym don, 42,532 ngut kiba la pynkynriah jaka, 6,701 ngut ki ba dei thok bad 4,668 ngut kiwei pat, u la ong.
Ka draft roll ka don 21,69,243 ngut ki nongthep vote, 10,53,039 ngut ki shynrang, 11,16,199 ngut ki kynthei bad 5 ngut ki Third Gender bad ka rati ka long 1060 ngut.
U Tiwari u la ong ba la pynmih haduh 6,51,735 tylli ki jingpynbna (Notice), 2,22,786 tylli na ka bynta ki nongjied bym shym la map bad 4,28,949 tylli na ka bynta ki jingbym iahap haka map.
“Ki jingbishar ba la pynlong 6,51,735, ki jingbishar ba la pyndep 100 percent bad ki nongthep vote ba la shah yndam kyrteng hadien ka dei 6,724,” u la ong.
Ka jingplie iaka lad ban pynbeit iaki jingdonkam kadei naduh ka 5 tarik u Nailar haduh ka 18 tarik u Nailur bad la ïohi ïa 21,694 tylli ki jingpynrung kyrteng lyngba (Form 6/6A), 2,276 tylli ki jingpynkylla, 2,526 tylli ki jingpyndam bad 12,860 tylli ki jingpynbeit kaba la pynlong ïa ka jingkheiñ ba khatduh sha ka 21,83,963 ngut ka jingkiew ba pura kaba long 14,780 percent lane palat ïa ka 0.68 percent.
Ka Final Roll ka don 10,59,743 ngut ki shynrang, 11,24,216 ngut ki kynthei, 4 ngut ki Third Gender bad ka ratio ka long 1061 haka Gender bad 606 haka EP.
U Tiwari u la bthah ïa ki nongthep vote ban pynshisha ïa ki kyrteng ha ki ophis jong ki BLOs lane ki EROs/AEROs.
U la ong ba ia ki jingujor pyrshah ia ka hukum jong ka ERO lah ban ujor hakhmat u District Magistrate hapoh 15 sngi katkum ka kyndon 24(a) bad ka jingujor kaba ar hakhmat u CEO hapoh 30 sngi katkum ka kyndon 24(b).
U la pynbna ïa ki jaka pynrung kyrteng kyrpang ha kylleng ki district katkum ka jingbthah jong ka ECI ha ka 1 tarik Risaw 2026 na ka bynta ki nongthep vote kiba don kyrteng ha ka thup kyrteng shwa ka SIR hynrei ki jah mynta, ki nongshong shnong kiba dei hok ki bym shym la pynrung kyrteng, ki samla kiba dang thep vote nyngkong, ki tymmen, ki PwD bad ki kynhun kiba rit paid.
U Tiwari u la ai khublei ia ki nongthep vote, ki sengsain pyrthei, ki BLA, ki dorbar shnong, ki Nokma, ki lad pathai khubor bad ki bor ka tnat election kynthup ia ki DEO, ki ERO, ki AERO, ki BLO Supervisor bad ki BLO kiba la pyndep ia ka SIR.
