Shillong, Risaw 26 : U Myntri Rangbah ka Jylla Conrad K Sangma ha ka sngi Nyngkong ula iathuh ba ka jingiakren bad ka Khasi Students’ Union (KSU) ka kynthup naduh ka kam thungkam ha NEIGRIHMS bad ka Facilitation Centre ka MRSSA haba kular ia ka jingiakren ba dang bteng ban iawad ia ki lad ban pynbeit.
Haba thoh ha X hadien ka jingialang, u Conrad ula thoh “Iakynduh bad ki nongialam ka Khasi Students’ Union (KSU) ban iakren ia ki mat kiba kongsan kiba la pynsngew da ka union”.
Ula ong “Ki jingiakren jong ngi ka kynthup naduh ka kam thungkam ha NEIGRIHMS, Facilitation Centre bad ki rukom treikam jong ka MRSSA, bad kiwei”.
“Ngin dang bteng iaka jingiakren kaba tei ban pynbeit ia kine ki jingeh bad ban trei ia ki kam ki ban lah pynbeit, ki ban iada iaka jingmyntoi jong ki briew jong ngi” ula ong.
Ka KSU, kaba la buddien ia ki san tylli ki mat jingdawa naduh ka 3 tarik Nailur, kala ong ba ka Sorkar kala kular ban sdang pyntreikam noh shen ia ka Facilitation Centre ha Umlung bad ban iakren ia ka jingai bhah ba 80:20 ha NEIGRIHMS bad ka Sorkar Pdeng.
Ka KSU kala dawa ruh ban pyndam noh ia ka project ka Shree Cement, pynkylla ia ka rukom treikam ha ka thungkam thungjam ha MPSC/DSC bad pynmih ia ka jingpynbna jong ka Amendment ka Migrant Workmen Act.
