Jowai Risaw 24: U Myntri Sorkar bad MLA ka Jowai u Bah Wailadmiki Shylla ula kyntu ia ki nongthep vote ba kin vote katkum ka jinglah ban treikam, ym da kaba shu kynnoh laiphew jait.
Haba kren ha ka rynsan ialap elekshon ha Mihmyntdu na ka bynta u kyrtong ka NPP ha ka elekshon shiteng samoi jong ka MP Lok Sabha na Shillong, u Bah Wailadmiki ula ong, ba u Dr DRL Nonglait udei u kyrtong uba biang tam na ka bynta ka Shillong Seat.
“U Dr Nonglait udei uba lah nang lah stad bha bad uba trei shitrhem ia ki kam shakri ia ka imlang sahlang” ula ong.
Ha kane ka jingialang, la pyni paitbah ia ki Video ia ki kam kiba la leh da ka Sorkar Jylla bad ia ki kam pynroi kiba ula wanrah kum u MLA.
“Peit bad bishar da ki kam. Don ki kynhun ki shu kynthoh ba ka sorkar kam leh eiei. Hynrei ki kam ki long kiba shai kdar ha ki madan” ong u Bah Wailadmiki.
Ula kynnoh ba kiba ialeh pyrshah ki kwah ba ki MLA ka Jowai bad Nartiang kin pulom noh.
“Don ki katto katne ki briew kiba kwah ba u MLA ka Nartiang bad Jowai kin pulom noh namar ba kila trei shitom bha ban pyndap ia ka jingdonkam jong u paitbah” ula ong.
“Kum u MLA nga lah wanrah bun tylli ki projek kam pynroi. Mynta kum u Myntri Sorkar phin sa iohi bun shuh shuh ki kam pynroi kiban dang wan” ula ong.
U Bah Wailadmiki ula ong, ba ki nongthep vote ha ka por kaba lah dep, kila leh bakla da kaba jied ia u MP u bym shim la don satia ha ka Liang Synshar ne Liang Pyrshah.
“Ngi lah jied ia u MP na kawei pat ka seng uba don marwei, um don bad ka Sorkar ne bad ka Liang Pyrshah, hynrei ula long beit marwei hapdeng. Kumno kum uta u MP un lah ban pynurlong ia ka sur jong ki mat jingdawa? ula ong.
Da kaba ong, ba ka NPP kadei shisha ka seng jong ki paid riewlum, ula ong “Ka NPP kadei ka seng riewlum kaba lah kylla sha ka Seng heh paid ha ka ri ne National Party. Kito kiba ong ba um don shuh ki seng riewlum, ki lah bakla shibun. Ia ka NPP lah kha hapoh ka Jylla Meghalaya. Wat ki briew kiba na kiwei pat ki Jylla ka thaiñ shatei lammihngi ki hap ban wan shane ban iakynduh ia ki nongialam kiba ha khliehduh. Kumta vote ia u kyrtong ka NPP u Dr Nonglait.”
Ha kane ka jingialang la wan ban iashimbynta lang da u Symbud Myntri Rangbah ka Jylla u Bah Sniawbhalang Dhar, ki MLA ka NPP kiba kynthup ia u Bah Comingone Ymbon, ka Kong Santa Mary Shylla ki MDC jong ka JHADC bad KHADC.
