Imphal, Risaw 22: Kumba hynriew ngut ki nongiakhih ki la mynsaw hadien ba ki pulit ki la siat ia ki da ki bom pynsat khmat ban pynpra ia ki nongiakhih ha Imphal ha ka sngi Ba-ar ha ka por ba ki iakhih halor ka jingshah pyniap jong ki lai ngut ki riew paidbah Meitei ha ka Kangpokpi distrik jong ka Manipur.
Ka jingïakynad ka la nangjur shuh shuh ha ka por ba u Myntri Rangbah ka Jylla u Yumnam Khemchand Singh bad u Myntri kam pohïing u Govindas Konthoujam ki la leit ban ïashim bynta ha ka jingïalehkai Poomsae Taekwondo Championship ba nyngkong jong ka Jylla Manipur ha Khuman Lampak Sports Complex ha Imphal West.
Katkum ki tyllong khubor, ki nongïakhih kiba la bitar ki la pyrshang ban ïaid paidbah sha katei ka jaka, da kaba pyrshah ïa ka jingïashim bynta jong ki myntri ha katei ka jingïalang katba ka jylla ka dang sngewsih ïa ki jingshah pynïap.
Lai ngut ki kynthei kiba iakhih, ki la mynsaw, haba ki pulit ki la siat ia ki bom pynsat khmat bad ki bom stun grenate hajan ka jingkieng Khurai Lamlong, katba ki nongiakhih ki dang pyrshang ban iaid shakhmat sha katei ka jaka ialehkai.Ia kine kiba mynsaw la pynkit noh sha ki jaka sumar ban ioh ia ka jingsumar.
Saw ngut ki nongiakhih ki la shah sumar ha Jawaharlal Nehru Institute of Medical Sciences (JNIMS), katba arngut pat la rah sha Raj Medicity.
Ha kane ka jingiakop la wan ban iashim bynta ruh da ki nongmih khmat na ka ri South Korea.
Ki nongiakhih ki la ong ba ka jingpynlong ia ka jingialang paidbah hapdeng ka jinglong jingman jong ka ain bad ka suk ka sain kaba la don mynta ka long kaba ym iahap.Ki la kynnoh ba ka sorkar kam shym la lah ban weng ia ka jingshah thombor kaba dang bteng bad ki la dawa ban kitkhlieh ia ki jingpyniap briew kiba dang shen.
Ha ka step jong ka sngi Nyngkong, lai ngut ki nonglum dieng kiba dei ki Meitei ki la shah siat iap ha ki riew thombor kiba kieng atiar ki bym lah ban ithuh ha Sunurok Hills ha Kangpokpi district.Katei ki jingshah pyniap ki la pynmih ia ka jingbitar kaba jur bad ka la pynlong ia ka jingkhang khyrdep kaba 48 kynta ha kylleng ka Manipur.
