Nongstoiñ, Risaw 19: Iwei I khynnah kynthei ba dang 8 snem ka rta, ila duh noh la ka jingim na ka jingshah tynrah ha kawei ka trok ha ka surok bah Nongstoin-Maweit, ha ka shnong Risiang.
Kane ka jingjia kala jia ha ka por shiteng sngi jong ka sngi Nyngkong katba Ine u khynnah I dang pyrshang ban mareh na shiliang sha shiliang jong ka surok. Ka trok kaba tynrah ia I ka don u nombor ML07-B-1437.
U Bah Pynshai Kharbani Secretary ka shnong Risiang, u la iathuh ba I tei I khynnah ba la khlad la tip kyrteng kum I Anisha Thyrniang, khun jong I kong ShaidalinThyrniang bad Bah Denis Mawdoh kiba napoh ka Shnong Risiang West Khasi Hills.
U la ong ruh ba na ka liang jong ka shnong mar mar hadien ka jingjia, ka la pyntip sha ki pulit ha kaba na ka liang jong ki pulit ruh ki la poi sha katei ka jaka ban leh ïa kaba donkam katkum ka aiñ.
