Shillong, Risaw 14 : Shisien hadien ba ka Bar Association kala weng noh ia ka boycott ban leit sha Iingkashari, ka Meghalaya High Court ha ka sngi Balang kala pdiang ia ka jingpan map ba khlem kyndon ki nongsaid din bad pynwai noh ia ka mukotduma suo motu contempt.
Ka mukotduma, PIL No. 21/2026, la register hadien ba ka Shillong Bar Association bad ka High Court of Meghalaya Bar Association ha ka 30 tarik Nailur, kila khot ia ka jingiakhih ban pep leit pyndep ia ki kam sha ki iingkasahri ha baroh ki district naduh ka 1 tarik Risaw tad haduh ba ka Sorkar ka weng ia u Amit Kumar kum u Advocate General.
Ha ka 8 tarik Risaw, ka Iingkashari ka Chief Justice Revati Mohite Dere bad Justice HS Thangkhoew kala ai ia ka contempt notice hapoh ka kyndon 15 jong ka Contempt of Courts Act sha ki nongkitkam jong ki Association, haba buh ban bishar ha ka 13 tarik Risaw.
Kat kum ka hukum ba pynmih ha ka 14 tarik Risaw, baroh ki nongiasaid ain lait noh tang kito kiba don ha ka SL No 13 bad 15 (vi) kila wan mih ha iingkashari ha ka 13 tarik Risaw bad pan map khlem da buh kyndon.
Ka Iingkashari kala shim khia ba ki arngut ki bym shym la wan mihkhmat, kla iehnohkam hashuwa ka rai ban boycott, bad ka jingtian bishar pyrshah ia ki, la weng noh.
U Advocates KS Kynjing bad N Syngkon kiba don ha ka Sl. Nos. 1 bad 2 kila ai ia ka affidavit ryngkat ki sakhi ba ki khlem iashimbynta ha ka boycott bad kila leit mih hakhmat ka Iingkashari. Ka Iingkashari kala weng noh ia ka contempt pyrshah ia ki ruh kumjuh.
Kiwei pat ki nongsaid ain ba don ha ka Sl. Nos. 3 haduh 8, 9 haduh 12, 14 bad 15(i-v) kila ai ia ka affidavit kaba iasyriem, kaba pan map khlem buh kyndon, haba pynpaw ia ka jingbabe bad kular ia ka iingkashari ba kin nym iashimbynta shuh ha kum kine ki jingpep leit iingkashari hadien habud.
Haba pdiang ia ka jingpanmap, ka Iingkashari kala weng noh ia ka jingbishar contempt ia ki bad pynwai ia ka mukotduma.
