Shillong, Risaw 14: U Symbud Myntri Rangbah bad National Vice President ka NPP Bah Sniawbhalang Dhar u la kam ba ki nongthep vote jong ki 8 ngut ki MLA barim ka UDP kiba iasoh BJP, mynta ki wan sha ka NPP, bad ka jingpyniasoh jong ki kan ym don jingktah eiei ia ka NPP haka elekshon MP shiteng samoi na Shillong Lok Sabha.
Haba kyntait ia ki jingtieng ba ki nongthep vote jong ka UDP kin leit sha ka VPP, u Bah Sniawbhalang u la ong, “Balei phi ong kumta? Sngewbha peit katkum ka rekod, ha ka elekshon MP ba la dep la jan baroh ki nongthep vote ki leit sha ka VPP, ka UDP ka la ioh palat 40,000 vote, ka NPP ka la ioh palat 1,80,000 vote, ym don jingktah ia ngi, mynta baroh kin wan sha ngi”.
U Bah Sniawbhalang ula pynskhem ba u kyrtong ka NPP u nang ioh bor ha kylleng ka jylla.
“U kyrtong jong ngi u nang ioh bor na ka por sha ka por, bad u nang khlain ha baroh sawdong ka Jylla” ula ong.
Halor ka jingialap ilekshon, u Bah Sniawbhalang u la ong, “Ka jingwan ki paidbah haki jingialang ka NPP phi la iohi da la ki jong ki khmat, man la ka jingialang ki paidbah ki tuid bha”.
U la ong ba ka jinglah jong ka NPP ka shong ha ki nongtrei kiba trei shitom jong ka bad ha u kyrtong ba thymmai jong ka.
“Ki nongtrei jong ngi ki trei shitom bha, bad u kyrtong jong ngi u dei uba thymmai bad um shym la ioh daw ei ei bad kata ka dei kawei na ki daw ba ki briew ki sngewtynnad ia u. Udei u rangbah uba bha bha, u la san bha haka rta bad uba don ka jingnang jingstad kumta ki briew kin phai beit sha u,” u la ong.
“Na ka NPP haba ngi ialap ilekshon ngi kren katkum ka mat ngim ju kynnoh ne kynthoh iano iano ruh.”
Haba kylli ba ka NPP kan kyrpad ia ka BJP ba kan nym pynieng kyrtong ha ka ilekshon MP shiteng samoi, u Bah Sniawbhalang ula ong “Em, baroh ki party ki laitluid ban pynieng kyrtong, kan ym ktah satia.”
