Shillong, Risaw 14 : Ka United Democratic Party (UDP) kan iakhun ia ka elekshon shiteng samoi ka Shillong Lok Sabha bad tei biang naduh tynrai hadien ba phra ngut ki MLA kila leit iasoh BJP, ong u General Secretary Bah Titosstarwell Chyne ha ka sngi Balang.
“Ngin iaid beit shakhmat. Mynta ngi dang pynlong ia ki jingialang ha kylleng ki jaka” ong u Bah Titos haba pyntip ba ka party kala sdang biang ban pynkhlain ialade.
U Bah Titos ula kubur ba ka jingphet seng kala pynlong ia ka party ban duhbor shibun.
“Hooid, ka jingphet jong ki kala ktah bha ia ka party. Hynrei haba kila mih na ka party dalade, ngim lah ban leh eiei halor kane” ula ong.
U ong ba ki nongthep vote kin sa rai la kine ki phra ngut ki MLA kila shet kylla ia ka jingkyrshan bala ai sha ki regional party.
“Ai ba ki paidbah kin bishar. Ka shong ha ki paidbah ban bishar” ula ong.
Kat kum ka jingong jong u, ka kam ba hakhmat eh ka long ban pynkhlain biang ia ka party, khamtam ha ki phra tylli ki constituency kiba la sah thylli da ka jingphet seng.
“Ngi hap ban wad ia ki nongialam ba thymmai bad ki kyrtong ban nang pynkhlain ia ka party. Ka dei ka kamram jong ka party ban lum ia kat kiba don ha kine ki constituency kiba iadon bad ka UDP ban trei bad pynkhlain ia ka party. Ngi la iasdang ban pynlong ia ki jingialang” ula ong.
U Chyne u la ong ba ka jingkwah ban don ka seng saiñ pyrthei riewlum kaba khlain ka dang don ha ki paidbah, bad bun ngut, kynthup ki dkhot barim, ki kwah ban wanphai biang sha ka party.
“Don bun ngut ki briew kiba kwah ban pynïasoh sha ka party, kynthup ruh ïa kito kiba la mih noh na ka party. Ki la pynpaw ïa ka jingkwah jong ki ban wanphai biang. Ki briew kiba nga la ïakynduh ki kwah ba ka seng saiñ pyrthei riewlum kan long kaba khlain ha ka jylla.
Lada ki kwah ïa ka seng saiñ pyrthei riewlum kaba khlain, ki hap ban noh synñiang lang ban pynkhlaiñ ïa ka,” u la ong.
haba la kylli halor ki jinkren u Paul Lyngdoh ba ong ba u Metbah Lyngdoh u lah ban long u briew uba khatduh tam ban sah ha ka UDP, u Bah Titos u la ong, “Na ka bynta kata, phi lah ban kylli ïa kane ka jingkylli na u hi.”
Ha kaba ïadei bad ki MDC na ki ri-lum Jaiñtia, u la ong, “Nga tharai ki la dep ban ai ïa ka jingkren ba kin ïai sah ryngkat bad ka party.”
Haba kylli la ki lai ngut na kiba phet party kin bteng ban long kum ki MLA ba shah sospon, u la kyntait ban ai jingkynthoh, da kaba ong, “Kata ka dei ka kam jong u Lamphang ban pynmih ïa ka rai. Ngam lah ban ai jingkynthoh ei ei halor ka rai jong u Lamphang. To ngin ap bad peit kumno kan long.”
Halor ka jingrah u Bah Lahkmen Rymbui ïa ka shuki Myntri ka UDP sha ka BJP, u la ong, “Ïa kata ka mat ki la ïakren hapoh ka MDA, hynrei ngam dei u dkhot jong ka MDA. Kata ka dei ka kam jong ki MLA ban ïakren, ym jong ngi.”
